ھەولێر-KDP.info- بەرپرسی فەرمانگەی پەیوەندییەکانی حکوومەتی ھەرێمی کوردستان ڕایگەیاند، لە ئێستادا پەیوەندییە دیپلۆماسییەکانی ھەرێمی کوردستان بە ھۆی سەردانیکردنی بەردەوامی سەرۆک و بەرپرسانی باڵای وڵاتان بۆ ھەولێر، لە ئاستێکی بەرزدایە و کار دەکرێت بۆ ئەوەی پەیوەندییەکان زۆر لەوەی ئێستاش پتەوتر بن.
سەفین دزەیی، تایبەت بۆ ماڵپەڕی فەرمیی پارتی دیموکراتی کوردستان گوتی: لە کابینەی نۆیەمی حکوومەتی هەرێمی کوردستاندا، ھەوڵەکان بەردەوام بەو ئاڕاستەیە بوونە پەیوەندیی دیپلۆماسیی ھەرێمی کوردستان لەگەڵ وڵاتان پەرەی زیاتریان پێ بدرێت، بۆیە ئێستا بە ھۆی سەردانیکردنی ژمارەیەکی زۆر سەرۆک و بەرپرسە باڵاکانی وڵاتانی جیھان بۆ ھەولێر، ئاستی پەیوەندیی دیپلۆماسیی ھەرێمی کوردستان زۆر بەرزە، ئەمەش جێگەی خۆشحاڵی و دەستخۆشییە.
دزەیی گوتیشی: بە ھۆی ئەو ئارامی و پێشکەوتنەی لە ھەرێمی کوردستان ھەیە، پەیوەندییەکی باشی ھەرێمی کوردستان لەگەڵ سەرجەم وڵاتاندا ھەیە، بە تایبەتیش لەم کابینەیەدا ھەوڵی زۆر دراوە بۆ ئەوەی پەیوەندییەکان زیاتریش بکرێن، بۆیە بەردەوام سەرۆکی وڵاتان و سەرۆکوەزیرانی وڵاتان و بەرپرسی باڵای وڵاتانی جیھان بە گشتی دێن بۆ ھەولێر و سەردانی کوردستان دەکەن، ئەمەش نیشانەیەکی زۆر باشە بۆ ئەوەی پەیوەندیی دیپلۆماسیی ھەرێمی کوردستان لەگەڵ جیھان لە ئاستێکی زۆر بەرزدا بێت.
دەشڵێ: ھەرێمی کوردستان لەم کابینەیەدا بە شێوەیەکی گشتی پێشکەوتنی زۆر باشی بە خۆیەوە بینیوە لە پەیوەندییەکان لەگەڵ وڵاتان، ئەمەش نەک تەنیا لە بواری دیپلۆماسی، بگرە بوارەکانی دیکەش بە تایبەت بواری ئابووری.
حکوومەتی ھەرێمی کوردستان بەردەوام لە پەیوەندیدایە، بۆ ئەوەی باشترین پەیوەندیی لەگەڵ سەرجەم وڵاتاندا ھەبێت، بە جۆرێک ئێستا پەیوەندیی ھەرێمی کوردستان لەگەڵ سەرجەم وڵاتان لە ئاستێکی زۆر باش و بەرزدایە و بەردەوامیش پەیوەندییەکان لە پێشوەچووندان.
بڵند ئیبراھیم