Hewlêr-KDP.info- Cîgirê Serokê PDKê Mesrûr Barzanî ragihand, “dîroka PDKê hemû serbilindî û berevanî ye.” Tekez kir jî, “hilbijartin tekane rêya diyarkirina awayê rêvebirina welatê me ye.”
Cîgirê Serokê Partiya Demokrat a Kurdistanê (PDK) Mesrûr Barzanî îro 1ê Cotmehê li gel hejmarek ji endamên sendîkayên Herêma Kurdistanê civiya û gotarek pêşkêş kir.
Cîgirê Serokê PDKê Mesrûr Barzanî ragihand, PDK ew partiye bû ku amade nebû rojekê ji rojan bihostek ji xaka Kurdistanê bê cudakirin û li ser vê pirsê jî amade bû şoreşê bike.
Herwiha got: “PDK ew partî ye ku di bin serkirdatiya Barzaniyê nemir de, razî nebû ku dest ji Kerkûkê berde, ji ber ku di wê baweriyê de bû ku ti beşekî Kurdistanê ji Kurdistanê nayê veqetandin.”
Mesrûr Barzanî tekez kir: “Ecindeya PDKê hertim xizmetkirina welatiyan bûye. PDK şanaziyê bi wê dike ku ti carî dest ji mafên rewa yên gelê Kurd bernedaye. PDK hertim xwe kiriye qurbaniya netewe û gelê Kurdistanê.
Derbarê referandomê de jî Mesrûr Barzanî got, PDK ew alî bû ku bi serokatiya Serok Barzanî nîşanî cîhanê da ku îradeya gelê Herêma Kurdistanê qet nayê şikandin û biryara referandomê da. Referandûm jî bi piraniya gelê Kurdistanê biser ket, ev jî şanaziyeke din a Partiya Demokrat a Kurdistanê ye.
Herwiha got: “Gelek kes û aliyên ku ligel PDKê bûn û LI hêviya serkeftinên zêdetir bûn, ji ber wê mil bi mil li gel PDKê beşdarî referandumê bûn û deng dan, lê piştre helwestên cuda nîşan dan. Lê belê van kes û partiyan bi têkçûna xwe ya psîkolojîk, referandûm cuda şîrove kirin.”
Cîgirê Serokê PDKê eşkere kir, referandûm kêmtirîn mafê welatiyekî ye ku bibêje çi dixwaze. Ji bo şikandina îradeya gelê Kurd gelek hewl hatin dayîn, lê PDK’ê nehişt ew îrade were şikandin û di referandûmê de biser ket.
Derbarê êrîşa terorîstên DAIŞê de jî, Mesrûr Barzanî got: “Dema êrîşa hovane ya terorîstên DAIŞê hat ser Herêma Kurdistanê û bû metirsiyeke mezin li ser aştî û pêkvejiyana hemû cîhanê, Pêşmerge û serkirdayetiya PDK berî her partiyeke din di sengerên berevaniyê de bûn. PDK partiya ku her tim ji bo aştiyê têdikoşe ye.”
Mesrûr Barzanî got jî, PDK herdem şer ji bo wê yekê dike ku Herêma Kurdistanê aram bibe û aştî li hemû navçeyê bicih bibe. Siyaseta PDKê gelekî diyar bûye, di heman dema parastina destkeftên neteweyî û welat kiriye, di bernameya wê hebûye ku çawa bikare projeyên baştir ji bo xizmetkirina welatiyan cibicî bike.