ھەولێر-KDP.info- ئەمڕۆ دووشەممە ٣٠-٩-٢٠٢٤، مەسروور بارزانی، سەرۆکی حکوومەتی ھەرێمی کوردستان، پێشوازیی لە محەممەد حیجازی، کونسوڵی میسر لە ھەرێمی کوردستان کرد، بە بۆنەی کۆتاییھاتنی ئەرکەکەی.
لە دیدارێکدا سەرۆکی حکوومەت سوپاسی کونسوڵی کرد بۆ ئەو ماوەیەی کاری بۆ پەرەپێدانی پەیوەندیی دوولایەنە کردووە و ھیوای سەرکەوتنییشی لە ئەرکی داھاتوویدا بۆ خواست.
کونسوڵی میسر، ڕێز و پێزانینی خۆی بۆ حکوومەتی ھەرێمی کوردستان دەربڕی، بۆ ئەو پشتیوانییەی لە ماوەی کارکردنیدا لێی کراوە و ستایشیی ئاسایش و سەقامگیریی ھەرێمی کوردستانی کرد و خواستی وڵاتەکەشی بۆ بەھێزترکردنی پەیوەندییەکان لەگەڵ حکوومەتی ھەرێمی کوردستان دووپات کردەوە.
