ھەڵەبجە-KDP.info- سەرۆکی لیستی ١٩٠ی پارتی لە پارێزگای ھەڵەبجە دەڵێت، خەڵک پێشوازیەکی باش لە کاندیدانی پارتی دەکه‌ن لە پارێزگای ھەڵەبجە، ھاوکات پێشی وایە، ئەگەر لە ھەڵبژاردنی ئەمجارە دەنگدەرانی ھەڵەبجە متمانە بە پارتی بدەن بە باشترین شێوە خزمەتیان دەکرێت.
ھۆشیار حوسێن بەگ، سەرۆکی لیستی پارتی لە پارێزگای ھەڵەبجە، بە ماڵپەڕی فەرمیی پارتی دیموکراتی کوردستانی ڕاگەیاند: پڕۆسەی بانگەشە لە ھەڵەبجە باش بەڕێوەدەچێت، بەڵام ھەندێ خروقات ھەیە لۆگۆکانی ئێمە لێدەکرێنەوە و پێشبینی دەکەین ئەوە بە بەرنامە بکرێت، چونکە خەڵکێکی ناسراوی تێدایە، به‌ڵام چاوەڕێی چارەسەرین بۆ ئەو کێشانە ده‌نا پەنا بۆ دادگا دەبەین، چونكه ئێمە وەک پارتی ھیچ سەرپێچیەکمان ئەنجامنەداوە لەو سنوورە.
سەرۆکی لیستی پارتی لە ھەڵەبجە دەشڵێت: ئێمە وەک لیستی پارتی ڕێنمایی و فەرمانەکانی سەرۆک بارزانی جێبەجێ دەکەین، ھەروەھا بڕیار و ڕێنمایەکانی کۆمسیۆنی سەربەخۆی ھەڵبژاردنەکانمان بەرچاو گرتووە، ئومێدمان ھەیە لە ھەڵبژاردنی ئه‌مجاره سه‌ركه‌وتنی به‌رچاو به ده‌ست ده‌هێنین.
ھۆشیار حوسێن بەگ ئاماژەی بۆ ئەوەشکرد: خەڵک پێشوازیەکی باش لە کاندیدانی پارتی دەکه‌ن لە پارێزگای ھەڵەبجە، ھەندێ پڕۆژەش لەلایەن کابینەی نۆیه‌می حکوومەتی ھەرێمی کوردستان به سه‌رۆكایه‌تی به‌ڕێز مه‌سروور بارزانی سه‌رۆكی حكوومه‌ت جێبەجێکراون، ئەو پڕۆژانەش تا ڕادەیەکی باش کاریگەری لەسەر دەنگدەرانی ھەڵەبجە ھەبووە.
حوسێن بەگ زیاتر گوتی: لە سنووری پارێزگای ھەڵەبجە ئەوەی پێمانکرابێت جێبەجێکراوە ئەوەشی نەکراوە بۆ خەڵکی ڕوونی دەکەینەوە ھۆکارەکەی چییە، ئەگەر لە ھەڵبژاردنی ئەمجارە دەنگدەرانی ھەڵەبجە متمانەی خۆیان بە پارتی بدەن ئەوە بەدڵنیایەوە پارتی بە باشترین شێوە خزمەتی ئەم سنورە دەکات.
قائید میرۆ