ھەولێر-KDP.info- کاندیدانی لیستی ١٩٠ی پارتی لە بازنەی ھەولێر دەڵێن، پارتی لە ھەڵبژاردنی ئەمجارە سەرکەوتنی گەورە تۆمار دەکات، دەشڵێن، لە کابینەی داھاتووی حکوومەتی ھەرێمی کوردستان پڕۆژەی زیاتر دەگەیەنینە ھەموو ناوچەکان.
ئالان شەھید ئەسکەندەر، کاندیدی ژمارە ٣ی لیستی ١٩٠ی پارتی لە بازنەی ھەولێر، لە ڕێگەی ماڵپەڕی فەرمیی پارتی دیموکراتی کوردستانەوە، وەکو کچە شەھیدێک سووربوونی خۆی دووپات دەکاتەوە کە بچێتە پەرلەمان بە ھەموو ھەوڵی خۆی خزمەتی کەسوکاری شەھیدان و پێشمەرگە دەکات، ھەر وەکو ئەوەی لەماوەی ١٠ ساڵی ڕابردوودا کە سەرۆکی لیژنەی شەھیدان و زیندانییانی سیاسی و پێشمەرگە بووە لە ئەنجوومەنی پارێزگای ھەولێر و بەردەوامیش بەدواداچوونی بۆ کێشەکانی ئەوان کردووە.
ھاوکات کاندیدی ژمارە ٢٤، د. ڕێزان شەھید ئەنوەر، بە ماڵپەڕی فەرمیی پارتی دیموکراتی کوردستان دەڵێ، خۆم کچە شەھیدم و ئێمەش لیستی شەھیدانین، ئەگەر متمانەی ھاووڵاتییانیش بەدەست بێنم، ئەوە لە بواری پزیشکی خزمەتی خەڵکی خۆمان دەکەین و کار بۆ دەرکردنی پڕۆژە یاسایەک دەکەین ھاووڵاتییان زیاتر سوود لە خزمەتگوزاری تەندروستی وەربگرن دەشڵێ، لیستی ١٩٠ی پارتی لیستی خزمەتکردنە بە ھەموو چین و توێژەکان.
شاخەوان سەدیقە سۆر گەردی، کاندیدی ژمارە ٣٣ی لیستی ١٩٠ی پارتی، بۆ ماڵپەڕی فەرمیی پارتی دیموکراتی کوردستان گوتی، پارتی پشکی شێری ئەو شانازییەی بەردەکەوێ لەو ئاوەدانییەی ئێستا ھەیە، لە کابینەی داھاتووی حکوومەتی ھەرێمی کوردستان پڕۆژەی زیاتر دەگەیەنینە ھەموو ناوچەکان.
کاندیدی ژمارە ٦١ی لیستی ١٩٠ی پارتی، مەزن ھیمداد، بۆ ماڵپەڕی فەرمیی پارتی دیموکراتی کوردستان دەڵێت، بەڵێن بە سەرۆک بارزانی و خەڵکی ھەرێمی کوردستان دەدەین، پابەندی کارنامەی پارتی بین بۆ کابینەی دەیەمی حکوومەتی ھەرێمی کوردستان، ئەگەر متمانەی دەنگدەران بەدەست بێنین ڕاستگۆ دەبین لەگەڵ خەڵکی خۆمان بۆ خزمەتکردنیان.
قائید میرۆ