ھەولێر-KDP.info- شۆڕشی ئەیلوول گەورەترین شۆڕشی سیاسی و چەکداری و کۆمەڵایەتیی گەلی کوردستان بوو لەپێناو پاراستنی ناسنامە و بەرگریکردن لە مافە ڕەواکانی گەلی کوردستان و بەرقەرارکردنی دیموکراتی، شۆڕشەکە بە ڕابەرایەتیی بارزانیی نەمر، ئەزموونێکی بێ وێنەی خەبات و تێکۆشان بوو کە ھەموو ناوچە جیاجیاکانی کوردستان و گشت توێژەکان و تێکڕای پێکھاتە ئایینی و نەتەوەییەکانی کوردستان تێیدا بەشدار بوون.
لە یادی ٦٣ ساڵەی ھەڵگیرساندنی شۆڕشی ئەیلوولدا، دکتۆر مەحموود عوسمان، سەرکردە و دکتۆر لە شۆڕشی ئەیلوول، لە لێدوانێکی تایبەتدا بە ماڵپەڕی فەرمیی پارتی دیموکراتی کوردستانی ڕاگەیاند: شۆڕشی ئەیلوول، شۆڕشێکی گرنگی کورد بوو، حکوومەتی ئەوکاتی عێراق، کوردی ناچار بە ھەڵگیرساندنی شۆڕش بە سەرۆکایەتیی پارتی و بارزانیی نەمر کرد، تا وای لێھات حکوومەتی عێراقی ناچار بە دانوستان و دەرکردنی ڕێککەوتنی ١١ـی ئازاری ١٩٧٠ کرد کە دەستکەوتێکی گەورە بوو.
مەحموود عوسمان دەڵێ: شۆڕشی ئەیلوول کوردی لە خانەقینەوە تا زاخۆ یەکگرتوو کرد، پێکەوە خەباتیان دەکرد، بەڵام بەداخەوە دووبەرەکیی ١٩٦٤ دروست بوو کە شتێکی باش نەبوو، بەڵام شۆڕش بە سەرۆکایەتیی بارزانی نەمر، بەھێزەوە بەردەوام بوو، تا گەیشتە ئەوەی حکوومەتی عێراق ناچار بە ڕێککەوتن کرا، بەڵام سیاسەتیان گۆڕا و دیسان مەیلی ئەوەیان ھەبوو کورد بخەنە ژێر دەسەڵاتی خۆیانەوە، بۆیە کورد قبووڵی نەکرد، سیاسەتی بەعس سیاسەتێکی ناڕەوا بوو، ئەوەبوو عێراق ھێرشی چەکداری کرد و کوردیش بەرگری دەست پێکردەوە.
شۆڕشی ئەیلوول، گەورەترین شۆڕشی سیاسی و چەکداری و کۆمەڵایەتیی گەلی کوردستان بوو لەپێناو پاراستنی ناسنامە و بەرگریکردن لە مافە ڕەواکانی گەلی کوردستان و بەرقەرارکردنی دیموکراتیەت لە عێراقدا، شۆڕشی مەزنی ئەیلوول بە ڕابەرایەتیی بارزانیی نەمر ئەزموونێکی بێ وێنەی خەبات و تێکۆشان بوو کە ھەموو ناوچە جیاجیاکانی کوردستان و گشت چینوتوێژەکان و تێکڕای پێکھاتە ئایینی و نەتەوەییەکانی کوردستان تێیدا بەشدار بوون.
مەحموود عوسمان کە لە شۆڕشەکەدا پێشمەرگەیەکی نزیکی بارزانیی نەمر بوو، زیاتر دەڵێ: پێشمەرگە و بەرگریی بەردەوام، وای لە حکوومەتی عێراق کرد، دانوستان لەگەڵ سەرکردایەتیی کورددا بکات، کاتێک بەردەوام ئامادە دەبێت قوربانی بدەی بۆ ئامانجەکەت، بۆ بەرانبەرەکەت دەردەکەوێت شەڕ چارەسەر نابێت و ناچاری گفتوگۆ دەبێت، ئێمەش لە شۆڕش ھەموو کات لەگەڵ گفتوگۆدا بووین.
ئەوەشی خستەڕوو: دەستکەوتەکانی ئەمڕۆ بەرھەمی خەباتی شۆڕشی ئەیلوول و شەھیدەکانمان، بەڵام ئەو ناکۆکییەی ئەمڕۆی نێوان حزبەکانم بەدڵ نییە، ھیوادارین کارێک بکرێت ئەم ناکۆکیانە نەمێنێت.
عەزیز ڕەسووڵ