ھەولێر -KDP.info- سەرۆکی ژووری بازرگانی ھەولێر گوتی: لەم مانگە پێشانگایەک لە ھەولێر بە بەشداری چەندین وڵات دەکرێتەوە، لەوانە، ئیران بە نزیکەی ٦٠ کۆمپانیا بەشدار دەبێت، کردنەوەی ئەو جۆرە پێشانگایانە بە ئامانجی ڕاکێشانی کۆمپانیای زیاتری بیانییە بۆ ھەرێمی کوردستان، بۆیە لەماوەی شەش مانگی ڕابردوو توانراوە کۆمپانیای چەندین وڵاتی نوێ بێن لە ھەرێمی کوردستان کار بکەن.
گەیلان حاجی سەعید، سەرۆکی ژووری بازرگانی ھەولێر، بۆ ماڵپەڕی فەرمیی پارتی دیموکراتی کوردستان گوتی: پێشانگایەک لە ھەولێر بە بەشداری ژمارەیەک وڵات دەکرێتەوە، ئێران بە نزیکەی ٦٠ کۆمپانیا بەشداری تێدا دەکات، ئامانجیش لە کردنەوەی ئەوپێشانگایە ئەوەیە، کۆمپانیاکان بێن بەشدار بن و کاڵاکانی خۆیان بە ھەرێمی کوردستان بناسێنن و پەیوەندی بازرگانی نێوان ھەرێمی کوردستان و وڵاتان فراوان بێت، ئێمەش ئامانجمانە پەیوەندیمان لەگەڵ وڵاتان زیاتر بێت، لەپێناو بووژانەوەی ئابووری ھەرێمی کوردستان.
گەیلا حاجی سەعید گوتیشی: جووڵەی بازرگانی لە ئاستێکی زۆر باش دایە، چونکە ئێستا پەیوەندی بازرگانی ھەرێمی کوردستان لەگەڵ وڵاتان زیاتر بووە و وڵاتی زیاتر بۆ کارکردن لە بواری بازرگانی ڕوویان لە هەرێمی کوردستان کردووە، لەم شەش مانگەی ڕابردوو توانیمان پەیوەندییەکانمان لەگەڵ وڵاتان لە بواری ئابووری و بازرگانی ئەبدەیت بکەینەوە، ھەوڵمان داوە وڵاتان بێن لە ھەرێمی کوردستان کاربکەن، پەیوەندی نوێشمان دروستکردووە، وڵاتی تایلەند و پاکستان و چەند وڵاتێکی دیکە ھاتوون بۆ ھەرێمی کوردستان و دەیانەوێت پەیوەندییان لەگەڵ ھەرێمی کوردستان ھەبێت.
بڕیارە پێشانگایەکە لە کۆتایی ئەم مانگە لە ھەولێری پایتەختی ھەرێمی کوردستان لە ماوەی سێ ڕۆژدا بکرێتەوە کە تێیدا کاڵای وڵاتان دەخرێتە ڕوو تا لە ھەرێمی کوردستان بازاڕ بۆ کاڵاکانیان بدۆزنەوە و پەیوەندییان لەگەڵ ھەرێمی کوردستان فراوانتر بکەن.
بڵند ئیبراھیم