ھەولێر-KDP.info- لە سنووری ناحیەی کەسنەزان، بە گوژمەی زیاتر لە نیو ملیار دینار پڕۆژەی دروستکردنی ڕێگەی گوندی پیڕەش لەلایەن تیمەکانی بەڕێوەبەرایەتیی ڕێگەوبانی ھەولێرەوە ئەنجام دەدرێت و قیرتاو کردنی شەقامەکانی گەڕەکی کەم ئەندامانیش لە سەر داهاتی شارەوانی بە گوژمەی ١٣٣ ملیۆن دینار ده‌ستی پێكردووه.
سائیب ھاڕوون ڕەشید، بەڕێوەبەری ناحیەی کەسنەزان، لە لێدوانێکی تایبەتدا بە ماڵپەڕی فەرمیی پارتی دیموکراتی کوردستانی ڕاگەیاند: لە بەردەوامیی گەیاندنی پڕۆژە خزمەتگوزارییەکان بۆ سنووری پارێزگای ھەولێر و بە ئامانجی ئاوەدانی و خزمەتکردنی زیاتری ھاووڵاتیان، بە گوژمەی ٥٣٨ ملیۆن و ٦٥٠ ھەزار دینار کارکردن لە پڕۆژەی دروستکردنی ڕێگەی گوندی پیڕەش لە سنووری ناحیەی کەسنەزان بەردەوامە.
بەڕێوەبەری ناحیەی کەسنەزان ده‌شڵێ، هه‌ر له سنووری ناحیه‌ی كه‌سنه‌زان، قیرتاو کردنی شەقامەکانی گەڕەکی کەم ئەندامان لە سەر داهاتی شارەوانی بە گوژمەی ١٣٣ ملیۆن دینار ده‌ستی پێكردووه.
سائیب ھاڕوون ڕەشید ئاماژە بەوە دەکات: کە ئەو پڕۆژەیە لەلایەن تیمەکانی بەڕێوەبەرایەتیی ڕێگەوبانی ھەولێر جێبەجێ دەکرێت و تاوەکو ئیستا ٥٥%ی کارەکانی تەواو کراوە کە بریتییە لە دروستکردنی ئاوبەر، خۆڵکاری و ڕاخستنی چینی تێکەڵە بۆ ژێر شەقامە کۆنکرێتیەکان و دیواری ڕاگر و قیرتاوکردنی ڕێگاکە.
ناحیەی کەسنەزان، لە سنووری پارێزگای ھەولێر، بەھۆی زۆریی ئەو پڕۆژە خزمەتگوزارییانەی لە کابینەی نۆیەمی حکوومەتدا بۆی چووە، بووە بە بەشێکی گرنگی شاری ھەولێر، چونکە زانکۆی بەریتانی و گەورەترین یاریگا و گەورەترین باخچەی ئاژەڵان لەسەر ئاستی عێراق کەوتووەتە ئەو سنوورەوە، ھاوکات جێگەی بایەخی سەردانیکەران و گەشتیارانی دەرەوەی ھەرێمی کوردستانیشە.
