ھەولێر-KDP.info- ناحیەی كەسنەزان كە ئێستا بەهۆی شەقامە خێراكانی 120 مەتری و 150 مەتری، دەكەوێتە بازنەی هەولێرەوە، لە ناحیەیەكی دوورەدەستی كەم خزمەتگوزارییەوە، گۆڕاوە بۆ ناوچەیەك نەوەك جێی سەرنجی خەڵكی هەولێرە، بەڵكوو بەهۆی ئەوەی گەورەترین شاری یاریی لە عێراق و گەورەترین باخچەی ئاژەڵانیش لە عێراقدا هەر لەو دەڤەرەیە، جێی سەرنجی هەموو خەڵكی هەرێمی كوردستان و عێراقە، لە كابینەی نۆیەمی حكوومەتیشدا، بە تایبەت بایەخی پێ دراوە.
سائیب ھاڕوون ڕەشید، بەڕێوەبەری ناحیەی كەسنەزان، تایبه‌ت بۆ ماڵپه‌ڕی فه‌رمیی پارتی دیموكراتی كوردستان په‌یوه‌ست به كه‌وتنه نێو قۆناغی زێڕین و مێژوویی كه‌سنه‌زانه‌وه گوتی، لەمڕۆوە كەسنەزان پێی ناوەتە قۆناغێكی زێڕین و مێژوویی، بەهۆی ئەوەی ژمارەیەكی تر لە پڕۆژەی گرنگ لەو ناحییەیە جێبەجێ كراون، لە میانەیاندا، كردنەوەی زانكۆی بریتانیی نێودەوڵەتی لە كەسنەزان لەلایەن مەسروور بارزانی سەرۆكی حكوومەتی هەرێمی كوردستانەوە كە یەكەم زانكۆیە لە ڕۆژھەڵاتی ناوەڕاست بەگشتی و عێراق و ھەرێمی كوردستان بەتایبەتی، بەم كوالێتیە بەرز و نێودەوڵەتییە، ئەمەش شانازیەكی گەورەیە بۆ ناحیەكەمان.
بەڕێوەبەری ناحییەكە ئەوەش دەخاتە ڕوو كە هەر لە كەسنەزان، مەسروور بارزانی، بەردی بناغەی پۆندی مۆنۆمێنتی شەھیدانی دانا. ئەم پۆندە لەم شوێنە ستراتیجی و گرنگە، سەڕەڕای ئەوەی دیمەنێكی ناوازە بە شاری ھەولێر دەبەخشێت، كۆمەڵێك سوودی ھەیە وەك: گلدانەوەی ڕێژەیەكی زۆری ئاو لە كاتی وەرزی باران و لافاو، ئەمەش دەبێتە ھۆی كەمكردنەوەی كۆبوونەوەی ئاو لە ھەولێر و كەسنەزان و دەتوانرێت بۆ ئاودێری و گەشتوگوزار و سامانی ماسی سوودی لێ وەربگیرێت.
سائیب هاڕوون، لە درێژەی باسی ئەو خزمەتگوزارییانەی پێشكه‌شی خەڵكی ئەو ناحییەیە كراوە دەڵێت: مۆنۆمێنی شەھیدان لە كەسنەزان، كارەكانی نۆژەنكردنەوەی كۆتایی ھاتووە و لەم نزیكانە بە ڕووی ھاووڵاتییان و میوانانی ھەرێمی كوردستان دەكرێتەوە.
هەروەها ئەوەشی خستە ڕوو كە باخچەیەكی پاراستنی ڕووەكی لە كەسنەزان هەیە و لەسەر ئاستی ڕۆژھەڵاتی ناوەڕاست شتێكی نموونەیی و بێوێنەیە، یەكەم باخچەیە بەم شێوەیە لە ڕۆژھەڵاتی ناوەڕاست دەكرێتەوە، شوێنەكەی دەكەوێتە ناو بەرزاییەكانی دارستانی كەسنەزان، ئەم باخچەیە گرنگیەكی زۆر بە ژینگە و پاراستنی ڕووك دەدات، ھەروەھا بۆ سوودوەرگرتن لە سامانی ڕووەكی لە ڕووی داو و دەرمانەوە زۆر بەسوودە.
بەڕێوەبەری ناحییەی كەسنەزان وێڕای ئەو خزمەتانە، ئاماژە بۆ ئەوە دەكات كە لەم چەند ڕۆژەی داھاتوودا، چەند پڕۆژەیەكی دیكەی خزمەتگوزاری دەخەنە خزمەت ھاووڵاتیانی ناحییەكە و سەرجەمیان خزمەتگوزاریی زۆر پێویستن.