دھۆک-KDP.info- بەرپرسی لقی ١٨ی ئامێدی ئاماژەی بۆ ئەوە کرد، بەھێزبوونی پارتی بە واتای بەھێزبوونی قەوارەی ھەرێمی کوردستان دێت و دەڵێ: لەسەر دەستی پارتی حکوومەتی عێراق دانی بە مافەکانی گەلی کورددا ناوە.
بەرەڤان حەمدی، بەرپرسی لقی ١٨ی ئامێدی، لە لێدوانێکی تایبەتدا بە ماڵپەڕی فەرمیی پارتی دیموکراتی کوردستانی ڕاگەیاند: لەگەڵ جەماوەری میحوەرەکانی سەرسنگ و بامەڕنێی سنووری قەزای ئامێدی کۆبووینەوە و جەختمان لەسەر پلانی داھاتوو کردەوە، بۆ کارکردنی ئۆرگانەکانی حزب لەو سنوورە، چونکە خەڵکی سنوورەکە شانازی بە پارتییەوە دەکەن، ئەو پارتییەی ٧٨ ساڵە خەبات لە پێناوی میللەتەکەمان دەکات.
ئاماژەی بۆ ئەوەش کرد، بەھێزبوونی پارتی دیموکراتی کوردستان، بە واتای بەھێزبوونی قەوارەی ھەرێمی کوردستان دێت و پارتی زامنی پاراستنی دەستکەوتەکانی خەڵکی کوردستانە، ئەوەی تا ئێستا کراوە بۆ خەڵکی کوردستان ھێشتا خوار ویستەکانی ئێمەیە، لەبەر ئەوە دەمانەوێ داھاتوویەکی باشتر بۆ ھاووڵاتییانی کوردستان زامن بکەین.
بەرەڤان حەمدی ڕوونی کردەوە: لە کۆبوونەوەکەماندا تیشکمان خستە سەر شۆڕشی ئەیلوولی مەزن کە بۆ یەکەم جار حکوومەتی عێراق دانی بە مافی کورددا نا، ئەویش بە دەرکردنی بەیاننامەی ١١ی ئازار کە حکوومەتی عێراقی ناچار کرا لەگەڵ سەرکردایەتیی شۆڕش بە ڕابەرایەتیی بارزانیی نەمر ئەو ڕێککەوتنە واژوو بکات.
قائید میرۆ