ھەولێر-KDP.info-  ئومێد خۆشناو، پارێزگاری هەولێر لە کۆنفرانسێکی ڕۆژنامەوانیدا ڕایگەیاند، ئەمڕۆ پێنجشەممە، 05-09-2024، مەسروور بارزانی، سەرۆکی حکوومەتی هەرێمی کوردستان سەردانی بازاڕی قەیسەریی هەولێری کرد و وەکو هاوکاریی دارایی بڕی 2 تا 20 ملیۆن دینار بە هەر دوکاندارێک دەدات کە بەهۆی ئاگرەکەوە زیانی پێ گەیشتووە.

ئومێد خۆشناو، پاریزگاری هەولێر لە کۆنگرەیەکی ڕۆژنامەوانیدا ڕایگەیاند، لە 5ـی ئایار کارەساتێک بەسەر بازاڕی قەیسەری هەولێردا داهات، هەرئەو ڕۆژی ڕامان گەیاند ئەو بازاڕە ڕۆحی هەولێرە کە بەوشێوەیە مامەڵەی لەگەڵ کرا و سووتێنرا و زیانێکی زۆر بە کاسبکاران کەوت.

گوتیشی: بۆ ڕۆژی دواتر سەرۆکوەزیران، مەسروور بارزانی سەردانی بازاڕەکەی کرد و دڵنیایی دایە کاسبکاران کە هەموو هەوڵێک دەدرێت بۆ ئاشکراکردنی بکەرانی ئەو تاوانە، هەروەها هاوکاری و پشتیوانیی کاسبکارانیش دەکرێت.

ئاماژەی بەوەش کرد، سەرۆکی حکوومەت ئەو کات بەکاسبکارانی گوت: حکوومەتی هەرێمی کوردستان هەرچی لە توانایدا هەبێت بۆ بارسووکردنی ئەو زیانانەی بە کاسبکاران کەوتووە دەیکات، دەشڵێت: لە 6ـی مانگەوە ڕێکارەکانی نۆژەنکردنەوەی قەیسەری گیرایە بەر و زیانەکان دەستنیشان کران.

ڕاشیگەیاند، ئەمڕۆ  5ـی ئەیلوول جارێکی دیکە سەرۆکوەزیران بۆ چەند مەبەستێک سەردانی بازاڕی قەیسەری کرد؛ یەکەم، پرسیاری ئەوەی کرد تاوەکو ئێستا چ کراوە؟ ئێمەش ڕوونکردنەوەمان پێدا. هەروەها ڕێڕەوی نۆژەنکردنەوەکە بە چ جۆرێکە و چۆن بەڕێوەدەچێت، کە هەمیشە جەخت دەکاتەوە پەلە کارەکە بکرێت تاوەکو کاسبکاران بگەڕێنەوە سەر کارەکانیان.

لەبارەی قەبارەی زیانەکان ئاشکرای کرد، لە هەفتەی داهاتوو دەست بەدابەشکردنی ئەو هاوکارییانە دەکرێت بۆ ئەوانەی دووکانەکانیان سووتاوە، کە 247 دووکان بووە، هەر یەکێک لەوانە بە پێی قەبارەی زیانەکان هاوکاری دەکرێت.

باسی لەوەش کرد، کەمترین ڕێژەی ئەو کاسبکارانەی زیانیان بەرکەوتووە دوو ملیۆن دینارە، زۆرترین ڕێژەش 20 ملیۆن دینارە، واتە هاوکارییەکە بەیەک شێواز نییە بە پێی قەبارەی زیانلێکەوتووانە. سەرەڕای ئەوەی دووکانەکەشی نۆژەن دەکرێتەوە.