ھەولێر-KDP.info- سەرۆکی لیژنەی سەرژمێری لە ھەرێمی کوردستان ڕایگەیاند، ئامادەکارییەکانی پرۆسەی سەرژمێری بەڕێوەدەچن و زیاتر لە ھەشت ھەزار و ٥٠٠ مامۆستا ڕاھێنانیان پێ دەکرێت.
مەحموود عوسمان، سەرۆکی لیژنەی سەرژمێریی گشتی لە ھەرێمی کوردستان، لە لێدوانێکی تایبەتدا بۆ ماڵپەڕی فەرمیی پارتی دیموکراتی کوردستان ڕایگەیاند: ھاوتەریب لەگەڵ بەغدا، ئامادەکاریی پرۆسەی سەرژمێریی گشتی بەردەوامە، ئێستا ھەشت ھەزار و ٥٧٤ مامۆستا ڕاھێنانیان پێ دەکرێت و دەچنە پرۆسەی ژمارەلێدان و گەمارۆسازی بۆ ئامادەکارییەکانی پرۆسەی ٢٠-١١ی ئەمساڵ.
ئەوەشی خستە ڕوو: لە ماوەی دوو مانگدا، پرۆسەی ژمارەسازی بەڕێوە دەچێت، دواتر دەچینە ناو پرۆسەی سەرژمێریی گشتی کە ٢٣ ھەزار مامۆستا لە ڕۆژی سەرژمێریی گشتیدا بەشداری دەکەن.
لەبارەی قەدەغەی ھاتووچۆوە، مەحموود عوسمان ڕوونی کردەوە: بڕیار دراوە ڕۆژانی ٢٠ و ٢١ی تشرینی دووەمی ئەمساڵ، لە سەرتاسەری عێراق و ھەرێمی کوردستان ھاتووچۆ قەدەغە بێت، چونکە ماڵ بە ماڵ دەگەڕێین بۆ سەرژمێریی گشتی، ئەوانەی لە ئەرکیشدان، پێویستە پشتگیریی شوێنی کارکردنیان ھەبێت.
قائید میرۆ