ھەولێر-KDP.info- بەڕێوەبەری گشتی لە وەزارەتی بازرگانی حکوومەتی ھەرێمی کوردستان گوتی: دەستکراوە بە ناساندنی بەرھەمی ناوخۆی ھەرێمی کوردستان بۆ دەرەوە، ئەمساڵ ١٢١ مۆڵەتمان بۆ ھەناردەکردنی بەرھەمی ناوخۆی ھەرێمی کوردستان داوە، چونکە حکوومەتی ھەرێمی کوردستان ئامانجیەتی لە ھەموو بەرھەمەکان پشت بە خۆمان ببەستین و ھەناردەی دەرەوەی بکەین، بۆیە لە ھەنگاوی یەکەمدا، بەرھەمی ناوخۆی بە وڵاتان دەناسێنێت.
نەوزاد شێخ کامیل، بەڕێوەبەری گشتی لە وەزارەتی بازرگانی حکوومەتی ھەرێمی کوردستان، بۆ ماڵپەڕی فەرمیی پارتی دیموکراتی کوردستان گوتی: ئەمساڵ جموجۆڵی بازرگانی ھەرێمی کوردستان لەگەڵ وڵاتان زۆر باشە، تا ئێستا ٢ھەزار و ٤١٦مۆڵەتی بازرگانیمان داوە بۆ ھاوردەی کەل و پەلی جۆراوجۆر، ١٢١مۆڵەتیشمان داوە بۆ ھەناردەکردنی بەرھەمی ناوخۆی ھەرێمی کوردستان، بۆیە جموجۆڵەکان لە ئاستێکی زۆر باش دان و بەراورد بە ساڵی ڕابردوو زۆر زیادی کردووە.
نەوزاد شێخ کامیل گوتیشی: ئەو مۆڵەتانەی دراون، بۆ ھەناردەی بەرھەمی ھەرێمی کوردستان بۆ دەرەوە، ھەندێک بەرھەمی ھاوردە هەن دووبارە ھەناردە دەکرێنەوە، وەکو کانزای لەکارکەوتوو، دەراسە، ئوتۆمبێل و بەرھەمی کشتوکاڵی وەکو ھەنار و تەحین و برنجی کوردی و چەندین بەرھەمی دیکەی کشتوکاڵی ھەناردەی دەرەوە دەکرێن.
شێخ کامیل ڕوونیشی کردەوە: ئەمە ھەنگاوێکی باشە بۆ ناساندنی بەرھەمی ناوخۆی ھەرێمی کوردستان، بۆ ئەوەی بزانین خواستی لەسەرە یان نا، تا لە داھاتوو ڕێژەی ھەناردە زیاتر بکرێت، چونکە ئامانجی حکوومەتی ھەرێمی کوردستان ئەوەیە پشت بە بەرھەمی خۆمان ببەستین و بەرھەمی خۆمان ھەناردەی وڵاتان بکەین، بۆ ئەو مەبەستەش بەردەوام ھەوڵ دەدرێت و ھەنگاوی کردەییشی بۆ نراوە.
بڵند ئیبراھیم