بەغدا -KDP.info- ئەندامێکی لیژنەی نەوت و غاز لە پەرلەمانی عێراق گوتی: ئەمەریکا و ئۆپیک گوشار لە عێراق دەکەن بۆ ئەوەی پێش هاتنی وەرزی سەرما دەست بە ھەناردەکردنی نەوتی ھەرێمی کوردستان بکرێتەوە، ئەویش بۆ ئەوەی ھەرێمی کوردستان بە سەقامگیری بمینێتەوە و بەشدار بێت لە ھەناردەکردنی نەوتی عێراق.
دکتۆر سەباح سوبحی، ئەندامی لیژنەی نەوت و غاز لە ئەنجوومەنی نوێنەرانی عێراق، بۆ ماڵپەڕی فەرمیی پارتی دیموکراتی کوردستان گوتی: ھەوڵەکان بۆ ھەناردەکردنەوەی نەوتی ھەرێمی کوردستان بەردەوامن و حکوومەتی ھەرێمی کوردستان ئامادەیی نیشانداوە، بەڵام پێویستە حکوومەتی عێراق ھەنگاوی کردەیی بنێت، بۆیە ئێستا ئەمریکا و ڕێکخراوی ئۆپیک ھاتوونەتە سەر خەت و داوا دەکەن نەوتی ھەرێمی کوردستان پێش ھاتنی وەرزی سەرما هەناردە بکرێتەوە.
دکتۆر سەباح سوبحی گوتیشی: ڕێکخراوی ئۆپیک دەیەوێت ھەرێمی کوردستانیش لە ھەناردەکردنی نەوتی عێراق بەشدار بێت و پشکی ھەبێت، چونکە عێراق تەنیا یەک ڕێگای ھەیە بۆ ھەناردەکردنی نەوت ئەویش بەسرایە، جا بۆ ئەوەی ھەر کاتێک گرفتێک ھەبێت ڕێگای دیکە ھەبێت، ئەویش بۆڕی نەوتی ھەرێمی کوردستانە بۆ بەندەری جەیھان، ئەمریکاش لەپێناو سەقامگیری ناوچەکە و نەبوونی کێشەی کەمی سووتەمەنی بەتایبەت لە وەرزی زستان کە یەکێتیی ئەورووپا پێویستی بە نەوتی زیاتر ھەیە، داواکارە و فشار دەکات بۆ ئەوەی نەوتی ھەرێمی کوردستان دەست پێ بکاتەوە، چونکە بۆ ھەرێمی کوردستان سەقامگیری زۆر گرینگە.
سوبحی باسی لەوەش کرد: ئەگەر نەوتی ھەرێمی کوردستان دەست پێ بکاتەوە نەوتی کەرکووکیش لەڕێگەی بۆڕی نەوتی ھەرێمەوە دەڕوات، بە نەوتی ھەرێمی کوردستان و کەرکووک دەبێتە ٧٥٠ھەزار بەرمیل لە ڕۆژێکدا، بۆیە ھەوڵەکان بەردەوامن و ھەر چۆنێک بێت پێویستە نەوتی ھەرێمی کوردستان بۆ دەرەوە دەست پێ بکاتەوە، بۆ ئەو مەبەستەش گفتوگۆی بەردەوامە.
بڵند ئیبراھیم