مەخموور-KDP.info- قایمقامی قەزای مەخموور ڕایدەگەیەنێت، حکوومەتی ھەرێمی کوردستان ساڵانە ھاوشێوەی ھەموو شارەکانی دیکەی ھەرێمی کوردستان بودجە بۆ ناوچە کوردستانییەکانی دەرەوەی ئیدارەی ھەرێمی کوردستان تەرخان دەکات، ئەمساڵیش بودجەی بۆ کۆمەڵێک پڕۆژە تەرخان کردووە، ئەمەش ئاوڕدانەوە و گرنگیدانی کابینەی نۆیەمی حکوومەتی ھەرێمی کوردستانە بە ناوچە کوردستانییەکان.

رزگار محەمەد، قایمقامی قەزای مەخموور، بۆ ماڵپەڕی فەرمیی پارتی دیموکراتی کوردستان گوتی: "ئێمە ئەو داواکاریانەی پێشکەشمان کردبوون بۆ ئەنجامدانی پڕۆژە لە مەخموور، حکوومەتی ھەرێمی کوردستان لە بودجەی پەرەپێدانی پارێزگاکان  ئەمساڵ لەو بودجەیەی بۆ ھەولێر تەرخان کراوە، بەشێکی بۆ مەخموور تەرخان کرا، ئەمەش گرنگیدانی حکوومەتی ھەرێمی کوردستانە بە ناوچە کوردستانییەکانی دەرەوەی ئیدارەی ھەرێمی کوردستان، کە خۆی مەخموور لە ڕووی ئیدارییەوە سەر بە پارێزگای مووسڵە، بۆیە بە سوپاسەوە لەلایەن پارێزگاری ھەولێر و حکوومەتی ھەرێم رەزامەندی لەسەر پڕۆژەکانی ئێمە درا، بۆیە حکوومەتی ھەرێمی کوردستان ھاوشێوەی شارەکانی دیکەی ھەرێمی کوردستان گرنگی بە ناوچە کوردستانییەکان دەدات و ئەمەش ئاوڕدانەوەیە لەو ناوچانە و خۆی بە خاوەنی ئەو ناوچانە دەزانێت".

محەمەد گوتیشی: "ئەو پڕۆژانەی رەزامەندییان لەسەر دراوە، ھەمەجۆرن و زیاتر لە بواری کارەبا و تەندروستی و پەروەردە و شارەوانی و رێگاوبان و کەرتەکانی دیکەن، چونکە حکوومەتی ھەرێمی کوردستان ساڵانە بودجە بۆ پارێزگاکان تەرخان دەکات و لەو بودجەیە بەشی ئێمەش وەکو ناوچە کوردستانییەکانی دەرەوەی ئیدارەی ھەرێمی کوردستان تەرخان دەکرێت، چونکە ئێمەش بە بەشێک لە ھەرێمی کوردستان ھەژمار دەکەن و گرنگیی زۆر لە لایەن کابینەی نۆیەمی حکوومەتی ھەرێمی کوردستان بە ناوچە کوردستانییەکانی دەرەوەی ئیدارەی ھەرێمی کوردستان دەدرێت، ئەمەش ھەمیشە مایەی خۆشحاڵیی ھاووڵاتیان و خەڵکی قەزای مەخموور و دەوروبەری مەخموورە، کە ئەو ناوچانەش بەشێکن لە ھەرێمی کوردستان".

حکوومەتی ھەرێمی کوردستان لە چوارچێوەی تەرخانکردنی بودجەی پەرەپێدانی پارێزگاکانی ھەرێمی کوردستان، بڕی ١٤ملیار و ٢٠٠ ملیۆن دیناری بۆ ژمارەیەک پڕۆژەی خزمەتگوزاری بۆ قەزای مەخموور و قوشتەپە و شەمامک و کانی قرژاڵە و سەرکارێز و قەتەوی و مامزاوە و ئەو ناوچانەی دەکەونە سنووری لقی ٢٣ی قەرەچووغی پارتی دیموکراتی کوردستان لە سنوری مەخموور، تەرخان کرد.

بڵند ئیبراھیم