Hewlêr-KDP.info- Serokê Herêma Kurdistanê Nêçîrvan Barazanî ragihand, divê PKK û hêzên din ên neyasayê ji Şingalê derkevin da ku aramî û ewlehî û jiyan û hêvî vegerin Şingalê.

Ji bo 10emîn salvegera komkujiya Şingalê li Zanîngeha Kurdistan a li Hewlêrê merasîmeke bibîranînê hat lidarxistin û Serokê Herêma Kurdistanê Nêçîrvan Barzanî jî li merasîmê axivî.

Serokê Herêma Kurdistanê Nêçîrvan Barzanî got, “Ez xwişk û birayên xwe yên Êzidî piştrast dikim ku em dê hertim piştgiriyê bidin wan û mafên wan biparêzin.”

Nêçîrvan Barzanî bi bîr anî ku “Komkujiya Şingalê yek ji sûcên herî xwînmij ên cîhanê ye” û got: “Em wan piştrast dikin, heta ku yekî revandî mabe jî em dê ji bo rizgarkirina wan bixebitin. Divê hemû civaka navneteweyî bixebite da ku ti carî sûcekî din ê wiha dubare nebe.”

Serokê Herêma Kurdistanê bi bîr anî ku DAIŞê Şingal wêran kiriye, bi sedhezaran Kurdên Êzidî ji warê xwe derketine û got: “Êşa vê komkujiyê ne 10 salan, heta hetayê nayê jibîrkirin. Divê xizmetkirina ji Şingalê re û rizgarkirina xelkê Êzidî karê me yê ewil be.”

Nêçîrvan Barzanî di berdewamiya axaftina xwe de bal kişand ser hinek pirsgirêkên li Şingalê û li pey çû:“Divê em hemû bi hev re bixebitin da ku Şingal nebe qurbaniya nakokiyên hêzên navçeyê. Divê Şingalî karê xwe bi xwe bikin û nebin dîlên hêzên derveyî sînor.”

Serokê Herêma Kurdistanê wiha domnad: “Divê PKK û hêzên din ên neyasayî ji Şingalê derkevin da ku hemû karibin asayiş, aramî û ewlehiyê vegerînin Şingalê.”

Serokê Herêma Kurdistanê Nêçîrvan Barzanî li ser Êzidîtî û Êzidiyan jî wiha axivî:“Êzidîtî dînê jiyandostî, mirovdostî û hevqebûlkirinê ye. Pirsgirêka wê bi ti dîn û baweriyên din re nîne. Êzidî gelekî dixwazin bi kesên li derdora xwe de bi di nava aştî û xweşiyê de bijîn. Ji ber vê jî heta ku te bivê ji aştî, aramî û seqamgîriyê hez dikin.”

Nêçîrvan Barzanî got, “DAIŞê xwestiye bi qirkirina Êzidiyan dijminahiyê bixe nav pêkhateyên Kurdistanê.”