مووسڵ-KDP.info- جێگری پارێزگاری مووسڵ بۆ کاروباری ئیداری دەڵێت، بەھۆی ئەوەی ئەنجوومەن بە نا یاسایی گۆڕانکاری لە یەکە ئیدارییەکانی مووسڵ کردووە، بەرپرسانی یەکەی ئیداریی سکاڵایان تۆمارکردووە، چونکە بە شێوەیەکی نا یاسایی ئەو گۆڕانکاریانە کراون.
ڕەفعەت سمۆ، جێگری پارێزگاری مووسڵ بۆ کاروباری ئیداری، بۆ ماڵپەڕی فەرمیی پارتی دیموکراتی کوردستان دەڵێت: دوای ئەوەی ئەنجوومەنی پارێزگای مووسڵ بەشێوەی نا یاسایی گۆڕانکاریان لە ٢١ یەکەی ئیداریی لە سنووری پارێزگای مووسڵ کرد بەبێ ئەوەی دەرگای خۆکاندیدکردن بکەنەوە و خەڵکێک خۆی کاندید بکات یان ھۆکارێک ھەبێت، چونکە پێویستە کردنەوەی دەرگای خۆکاندیدکردن بکاتەوە لە ماوەی ١٥ ڕۆژ ئەوکات بەپێی ئەوانەی خۆیان کاندید کردووە گۆڕانکاری بکرێت، بۆیە بەرپرسە یەکە ئیدارییەکانی مووسڵ ئەوانەی ئەنجوومەن بە نا یاسایی بڕیاری لادانی ئەوانی داوە ڕۆیشتوون لە دادگای پەیوەندیی فەرمانبەران ھەیە لە بەغدا سکاڵایان تۆمارکردووە لەسەر ئەنجوومەنی پارێزگای مووسڵ ئەوە کارێکی نا یاساییە و ناکرێت بەبێ ھۆکار گۆڕانکاری ئەنجام بدەن و لە خۆیانەوە کۆمەڵێک کەس لە شوێنی ئەوان دانێن.
ڕەفعەت سمۆ گوتیشی: لە ئێستادا دانیشتنەکانی ئەنجوومەن وەستاون و پارتی و کوتلەی سووننە بایکۆتی دانیشتەکانیان کردووە و بەشداری ھیچ دانیشتنێکی ئەنجوومەن ناکەن، بۆیە جارێ بەرپرسە یەکە ئیدارییەکان لە شوێنی خۆیان ماون و دەوامی خۆیان دەکەن، جارێ ھیچ بڕیارێک جێبەجێ نەکراوە و ئەو پرسە بە ھەڵواسراوی ماوەتەوە و ھێشتا یەکلایی نەبووەتەوە، چونکە دانیشتنەکە بەشێوەیەکی نا یاسایی ئەنجامدراوە و بەھیچ شێوەیەک ناکرێت گۆڕانکاری لە بەرپرسە ئیدارییەکان بکرێت.
بڵند ئیبراھیم