ھەولێر-KDP.info- ڕۆژی پێنجشەممە، ١-٨-٢٠٢٤، دووەم کۆڕبەندی پەروەردەیی کوردستان بە ناونیشانی "پەروەردەی باش، دەرفەتی باشتر" بە چاودێریی ئالان حەمە سەعید، وەزیری پەروەردەی حکوومەتی ھەرێمی کوردستان دەستی پێکرد و بڕیارە دوو ڕۆژ بخایەنێت.
ئالان حەمەسەعید، وەزیری پەروەردەی حکوومەتی ھەرێمی کوردستان لە وتارێکدا گوتی: ئەگەر ئاوڕێک لە مێژووی ١٠٠ ساڵەی کەرتی پەروەردە لە کوردستان بدەینەوە، ئەوە دەبینین بە چەندان قۆناغدا تێپەڕیووە.
ئاماژەی بەوەکرد: "لە ساڵی ١٩٠٧، شێخ عەبدولسەلام بارزانی نامەیەک بۆ سوڵتان عەبدولحەمید دەنوسێت، لە یەکێک لە خاڵەکانیدا، داوا دەکات خوێندن بە زمانی کوردی بێت، ھەروەھا ئەو باجانەی وەردەگیرێت، قوتابخانەی لە گوندەکان پێدروست بکرێت".
ئالان حەمەسەعید باس لەوەش دەکات: "لە دوای ساڵی ١٩٩١ەوە، سەرەتا وەزارەتی پەروەردە دروست بوو، کە یەکەم وەزارەتی خۆماڵیی حکوومەتی ھەرێمی کوردستان بوو. ھەروەھا قۆناغی دوای ٢٠٠٣، قۆناغی دروستکردنی قوتابخانە و دامەزراندنی مامۆستا و دەستپێکردن بە پڕۆگرامەکانی خوێندن و ئەو گۆڕانانە بوو".
وەزیری پەروەردە ڕاشیگەیاند: "خۆشبەخترین کاتەکانی ئێمە ئەو سەردەمەیە کە ھۆشیاریی خێزانیی و کۆمەڵگەیی بۆ بابەتی پەروەردە زیادی کردووە، ھەروەھا دایکان و باوکان بایەخی زیاتر بە خوێندنی منداڵەکانیان دەدەن. ئەوەش بڕیاربەدەستانی پەروەردە دەخاتە ژێر فشارێکی زۆرتر، تاوەکوو کاری زیاتر و جیددی تر بکەن بۆ ئەوەی بتوانن کەرتی پەروەردە باشتر بکەن".
ئەو کۆڕبەندە تیشک دەخاتە سەر ڕۆلی پەروەردە لەسەر بەھێزکردنی ئینتیمای نیشتیمانی، لەسەر ئەو گۆڕانکارییانەی شۆڕشی پیشەسازی پێنجەم، بەتایبەت لەبواری زیرەکی دەستکرد کە لەم قۆناغە پێی گەیشتووین، تیشک دەخاتە سەر ئەوەی کە چۆن بتوانین پانتایی خوێندنی پیشەیی و تەکنیکی فراوان بکەین.