ھەولێر-KDP.info- کۆمسیۆنی باڵای سەربەخۆی ھەڵبژاردنەکانی عێراق لە ئامادەکاریەکان بۆ ھەڵبژاردنی پەرلەمانی کوردستان بەردەوامە و بڕیارە لە ماوەیەکی نزیکدا ھەم تیروپشک بکرێت بۆ کاندید و لیست و ھاوپەیمانیەکان و ھەمیش لێکۆڵینەوە لە ناوی کاندیدان دەکرێت، دواتریش پڕۆسەی بانگەشە بەفەرمیی دەست پێدەکات.
جێگری بەرپرسی ئۆفیسی پارێزگای ھەولێری کۆمسیۆنی باڵای سەربەخۆی ھەڵبژاردنەکانی عێراق، بۆتان شێرکۆ، بۆ ماڵپەڕی فەرمیی پارتی دیموکراتی کوردستان گوتی: "ئێمە لە ئامادەکاریەکان بۆ ھەڵبژاردنی پەرلەمانی کوردستان بەردەوامین و ھەر ڕێنمایەکمان بۆ بێت ئێمە کاری لەسەر دەکەین و جێبەجێی دەکەین و تۆمارکردنی ناوی لیست و ھاوپەیمانی و کاندیدەکان کۆتایی پێھاتووە و چاوەڕێی بڕیاری ئەنجوومەنی کۆمسیارانین بۆ ئەوەی ژمارەیان بۆ دیاری بکرێت، بۆیە لەم ڕۆژانە ئەنجوومەنی کۆمسیاران کۆدەبێتەوە و وادەیەک بۆ تیروپشک دیاری دەکرێت و دواتر بڕیار دەدرێت کەی بانگەشە دەست پێبکات ".
بۆتان شێرکۆ گوتیشی: "بوودجەمان بۆ دابینکراوە و ھەموو پێداویستی ھەڵبژاردنیش دابینکراوە و ئەوەی ماویشە خەریکی دابینکردنین، چونک دوو جۆرە کەلوپەل ھەیە جۆرێکی ھەستیارە و جۆرێکیش ئاساییە، ئەوەی ھەستیارە وەکو وەرەقەی ئیقتراح و ھەندێک پێداویستی دیکە ئەوەیان ماوە و ئەوەی دیکە ھەمووی دابینکراوە".
شێرکۆ باسی لەوەشکرد: "تۆمارکردنی ناوی کارمەندانی سەر سندوقەکانی دەنگدانیش ئەمڕۆ کۆتایی پێدێت و ڕەوانەی بەغدا دەکرێت و لەوێش تیروپشکی بۆ دەکرێت و ئەوەی ناوی دەربچێت دەبێتە کارمەندی کۆمسیۆن بۆ ڕۆژی ھەڵبژاردن، کە ئێمە پێویستمان بە ١٧ ھەزار کارمەند ھەیە".
لای خۆشیەوە خالید عەباس، بەرپرسی ئۆفیسی کۆمسیۆنی باڵای سەربەخۆی ھەڵبژاردنەکانی عێراق لە دھۆک، بۆ ماڵپەڕی فەرمیی پارتی دیموکراتی کوردستان گوتی: "لە پارێزگای دھۆک بەردەوامین لە ئامادەکاریەکان و ناوە ناوە ڕێنماییمان بۆ دێت و ئێمەش جێبەجێ دەکەین و دابەشکردنی کارتی دەنگدانیش بەردەوامی ھەیە، بۆیە پڕۆسەی ئامادەکاریەکان بەشێوەیەکی زۆر باش بەڕێوەدەچێت".
ھەر لەمبارەیەوە وتەبێژی کۆمسیۆنی باڵای سەربەخۆی ھەڵبژاردنەکانی عێراق، جومانە غەلای، بۆ ماڵپەڕی فەرمیی پارتی دیموکراتی کوردستان گوتی: "ژمارەی گشتی وێستگەکانی پێشنیارکراوە بۆ دەنگدان ٧ ھەزار و ٤٧ وێستگەیە و ژمارەی بنکەکانیش ھەزار و ٤٢٧ بنکەیە و ژمارەی دەنگدەرانیش لە ھەرێمی کوردستان ژمارەیان ٢ ملیۆن و ٨٨٨ ھەزار و ١٦٢ دەنگدەرە و بڕیارە بەم نزیکانەش بڕیار بدرێت بۆ ئەوەی تیروپشک بکرێت بۆ دانانی ژمارە بۆ کاندید و لیست و ھاوپەیمانیەکان".
ناوبراو وتیشی: "پێویستە لەکاتی ڕەوانەکردنی ناوی کاندیدان بۆ لێکۆڵینەوە لەلایەن دەستەی نەزاھە و وەزارەتی ناوخۆی ھەرێم و عێراق لە ماوەی ١٥ ڕۆژ کارەکانیان تەواو بکەن و بۆ ئێمەی بگەڕێننەوە".
بڵند ئیبراھیم