ھەولێر-KDP.info- بەڕێوەبەری بەنداوەکانی ھەرێمی کوردستان دەڵێت، بەنداوی گۆمەسپان کارکردن تێیدا بەردەوامە و ڕێژەی جێبەجێکردنی گەیشتووەتە ٧٠%و بڕیارە تا کۆتایی ئەمساڵ تەواو بکرێت، کە بۆ چەندین کەرتی جیاجیا سوودی لێوەردەگیرێت، وەکو کشتوکاڵ و ئاوی خواردنەوە و گەشتوگوزار و ئاژەڵداری.
رەحمان خانی، بەڕێوەبەری بەنداوەکانی ھەرێمی کوردستان، بۆ ماڵپەڕی فەرمیی پارتی دیموکراتی کوردستان گوتی: "بەنداوی گۆمەسپان یەکێکە لە بەنداوەکانی سنووری پارێزگای ھەولێر و گرنگی زۆری بۆ پارێزگای ھەولێر و زۆر کەرتی دیکەش ھەیە، ھاوکات پێش دوو ڕۆژ خۆم سەردانی بەنداوەکەم کرد و بە ڕێژەی ٧٠%ی تەواو بووە و بەنداوەکەش ٩٧ ملیۆن مەتر سێ جار ئاو دەگرێت و دەتواندرێت لە زۆر بابەت سوودی لێوەربگرین".
رەحمان خانی گوتیشی: "ئەو بەنداوە سوودی زۆری بۆ پارێزگای ھەولێر و دەورووبەری ھەولێریش دەبێت و دەبێتە ھۆی چارەسەری بەشێکی کەمئاوی ھەولێر، بەڵام لە ڕووی دیکە وەکو کشتوکاڵ و ئاژەڵداریش سوودی لێوەردەگرین و بڕیارە پڕۆژەی گەورەی گەشتوگوزاریشی لەسەر دروست بکرێت و ببێتە شوێنێکی گەشتوگوزاریش و ئاوی ژێر زەویش دەبووژێنێتەوە".
ناوبراو گوتیشی: "کارکردن لە پڕۆژەکە بەردەوامی ھەیە و بڕیارە تا کۆتایی ئەمساڵ تەواو بکرێت، بۆیە پڕۆژەکە زۆر گرنگە بۆ پارێزگای ھەولێر و لە زۆر ڕووەوە سوودی لێوەردەگرین".
تێچووی پڕۆژەکە ٩٥ ملیار دینارە و بەرزیەکەشی ٧٠ مەتر و درێژیەکەشی ٥١٢ مەترە و ئێستا ٧٠%ی تەواو بووە و بۆ یەکەمجاریش لەسەر ئاستی عێراق و ھەرێمی کوردستان کۆنکرێتی جۆری ئارسیس لە بەنداوەکە بەکار دەھێندرێت، کە یەکێکە لە گەورەترین بەنداوەکانی ھەرێمی کوردستان و لەسەر ڕووبەری ٦ ملیۆن و ١٢٥ ھەزار مەتر دووجا دروست دەکرێت.
بڵند ئیبراھیم