ھەولێر-KDP.info- بەڕێوەبەری ڕاگەیاندنی دەستەی گەشتوگوزاری ھەرێمی کوردستان دەڵێت، بڕیاری سەرۆکی حکوومەتی ھەرێم بۆ ھەڵگرتنی باج لەسەر ھۆتێلی چوار و پێنج ئەستێرە و خواردنگەکان کاریگەری لەسەر بووژانەوەی کەرتی گەشتیاری و زیادبوونی ڕێژەی گەشتیاری و ئەنجامدانی پڕۆژەی زیاتری گەشتیاری دەبێت و بڕیارەکەش کەوتۆتە بواری جێبەجێکردنەوە.
ئیبراھیم عەبدولمەجید، بەڕێوەبەری ڕاگەیاندنی دەستەی گەشتوگوزاری ھەرێمی کوردستان، بۆ ماڵپەڕی فەرمیی پارتی دیموکراتی کوردستان گوتی: بڕیاری سەرۆکی حکوومەتی ھەرێمی کوردستان بۆ ھەڵگرتنی باج لەسەر ھۆتێلی چوار و پێنج ئەستێرە و خواردنگەکان لەسەر گەشتیاران بڕیارێکی زۆر کاریگەرە و زیاتر کەرتی گەشتیاری دەبووژێنێتەوە و ئێستاش چۆتە بواری جێبەجێکردنەوە.
ھاوکات جەختیش دەکاتەوە: ئەو باجەی پێویست بوو پێشتر گەشتیار بیدات ئێستا نایدات، بۆیە ئەمە لێکەوتەی پۆزەتیفی دەبێت و دەبێتە ھۆی ئەوەی ھانی وەبەرھێنەر و سەرمایەداران بدات بۆ ئەوەی پڕۆژەی گەشتیاری چوار ئەستێرەیی و پێنج ئەستێرەیی ئەنجام بدەن، لەبەر ئەوەی گەشتیار سەردانی ئەو وڵاتانە و ناوچانە دەکەن تێچووی کەمتری ھەیە، بۆیە ئەم بڕیارە بارگرانی سەر شانی گەشتیار کەمتر دەکاتەوە، بۆیە ئەمە ڕێژەی گەشتیاریش زیاد دەکات.
ئیبراھیم عەبدولمەجید ڕوونیشیکردەوە: ئەم بڕیارەی سەرۆکی حکوومەت پێشوازییەکی بێ وێنەی لێکراوە لەلایەن کەرتی تایبەتەوە و، بەتایبەت خاوەن ھۆتێل و خواردنگەکان، چونکە ئەم بڕیارە وەڵامێکی دڵخۆشکەربوو بۆ داواکاری ھۆتێل و خواردنگەکان، لە ھەرێمی کوردستان ٤٧٠ ھۆتێل و زیاتر لە ٦٠٠ خواردنگەمان ھەیە، کە بەشێک لەوانە چوار و پێنج ئەستێرەن، ئەمەش جووڵەی زیاتر دەخاتە کەرتی گەشتیاری و دەرفەتی کاریش لەو کەرتە زیاتر دەبێت، چونکە پڕۆژەی زیاتر دەکرێت.
ناوبراو دەشڵێت: ئەگەر گەشتیارێک سەردانی ھەرێمی کوردستانی بکردایە نرخی شەوێک مانەوە ١٠٠ دۆلار بووایە پێویست بوو ١٠ دۆلار باج بدات ئێستا ئەوە نەماوە و لە خواردنگەکانیش بەھەمان شێوە کەسێک بایی ٥٠ ھەزار دینار خواردنی بخواردایە پێنج ھەزار دینار باجی دەدا ئێستا ئەوەش نەماوە، بۆیە ئەم بڕیارە کاریگەری زۆری دەبێت ھەم بۆ بووژانەوەی کەرتی گەشتیاری و ھەمیش بۆ زیادبوونی ڕێژەی گەشتیاران.
بڵند ئیبراھیم