مامۆستا ڕزگار ئەنوەر
گەلی کوردستان بەدرێژایی مێژوو، لەلایەن ڕژێمە داگیرکەرەکانەوە زوڵم و ستەمی بەرامبەرکراوە، ئەوەی دوژمنان لە کوردیان ویستووە قبوڵکردنی ژێردەستەیی و دەستبەردار بوون بووە لە شوناسی نەتەوەیی، کە ئەمە بەلای کورد ھێڵی سوور بووە و مردنی ھەڵبژاردووە بەسەربەرزی نەک ژیانێکی ژێردەستەیی.
ھەربۆیەشە دوژمنانی گەلەکەمان بە ئاگر و ئاسن کەوتوونەتە گیانی ڕۆڵەی کورد و، شاڵاوی ئەنفال دیارترین ئەو تاوانەیە کە بۆ سڕینەوەی میللەتەکەمان ڕژێمەکانی عێراق کردوویانە لە دیارترینیان ڕژێمی بەعس لەسەر میللەتەکەمانی تاقیکردەوە و لەناویشیاندا بە ئامانجگرتنی بارزانیەکان کە ٤١ ساڵ بەسەر ئەنفالکردنیان تێدەپەڕێت کە چەند ڕاستیەک ڕووندەکەینەوە لەوانە:
دەڤەری بارزان لانکەی شۆڕش و سەرھەڵدان بووە، لەوێ بانگی ئازادی کوردان زوڵاڵ تر بەگوێی دوژمن دراوە و شۆڕشەکانی کورد ھەر لە شێخ عەبدولسەلام بارزانی و شێخ ئەحمەدی بارزانی و تاکو دەگات بە مەلا مستەفا بارزانی لەوێوە پەلی ھاوێشتووە بۆ ناوچەکانی تری کوردستان و چەخماخەی شۆڕش بڵێسەی سەندووە و بەرامبەری دوژمن وەستاونەتەوە، ھەربۆیەشە بارزانیەکان بەو شێووە دڕندانە ئەنفالکراون و دوژمن وای دەبینی بە ئەنفالکردنی بارزانیەکان کۆتایی بە شۆڕش و ڕاپەڕینەکان دێنێ و شتێک ناھێڵێ بەناوی کورد و مافی کورد.
بێخەبەربوو لەوە ھەرماڵێکی کورد ماڵی بارزانە و کورد و بارزانی گرێدراوی یەکترن و لێک جیانابنەوە و لە بەرامبەردا دوژمنان تەنیا سەرشۆڕیان بۆ دەمێنێتەوە.
ھەر بۆیەشە ئەنفالکردنی بارزانیەکان وەک ھەموو ئەو تاوانانەی بەرامبەر بە گەلی کوردستان کران، گەلی کوردی لە بەرەنگاربوونەوەی ستەم و دیکتاتۆری سارد نەکردەوە و ئیرادەی گەلی کوردستانی بۆ سەرکەوتن و ئازادی و گەیشتن بەمافەکانی بە ھێزترکرد و بە بڕوایەکی پتەوی کوردانەوە بەردەوامی دا بە شۆڕش و تێکۆشان.