گەرمیان-KDP.info- بەرپرسی لقی ٢٢ی گەرمیانی پارتی دیموکراتی کوردستان باس لە ھۆکاری دواکەوتنی دەرئەنجامی تەقینەوەی ئۆتۆمبێلەکەی دەکات و ئەوەش دەخاتەڕوو کە داوا لە دامودەزگا ئەمنییەکان دەکەن ئەنجامی لێکۆڵینەوەکان بۆ ڕای گشتی بخەنەڕوو.
ئەکرەم ساڵح بەرپرسی لقی ٢٢ی گەرمیانی پارتی دیموکراتی کوردستان، لە لێدوانێكی تایبەتدا بۆ ماڵپەری فەرمیی پارتی دیموکراتی کوردستان گوتی: بەداخەوە تا ئێستا ھیچ لایەنێکی فەرمی ئەمنی لە سنووری گەرمیان ڕوونکردنەوەیان نەداوە لەسەر دەرئەنجامی ئەو کردەوە تیرۆرستیەی کە ڕووبەڕوومان بۆوە لە ڕۆژی ١٥ / ٧ کە بەوھۆیەوە خۆمان بە موعجیزە ڕزگارمان بوو، کە ئۆتۆمبێلەکەمان بە تەواوی سوتا وێڕای زیانی ماددی زۆر بەو دەورووبەرە، تاکو ئێستا ئێمە چاوەڕوانی ئەنجامی لێکۆڵینەوەیەن بە تایبەت لە ئاسایشی گەرمیان کە ئەرکی لێکۆڵینەوەی کردەوە تیرۆرستیەکەیان گرتۆتە ئەستۆ، چونکە دەزگای ئاسایشی گەرمیان تەواوی کامێراکانیان ھەڵگرتووەتەوە و بردوویانە بۆ لێکۆڵینەوە بەپێی ئەو بەدواداچوونەی کە خۆمان کردوومانە لە کامێراکانەوە کەسەکە بە ڕوونی دەرکەوتووە و ئەم گرتە ڤیدیۆیانە لای ئاسایشی گەرمیانیش ھەیە کە ئەو کەسەی کردەکەی ئەنجامداوە لە کامێراکان بەڕوونی دیارە چۆن ھاتووە و چۆن ڕۆیشتووە.
ناوبراو ڕاشیگەیاند: ئەوەی جێگای سەرسوڕمانە بۆچی تا ئێستا دەزگا ئەمنییەکانی ئەم سنوورە ھیچ دەرئەنجامێکیان بڵاو نەکردووەتەوە و ئاگاداریان نەکردووینەتەوە لەسەر ئەو ڕووداوە و بەنیازین ئەمڕۆ بەشێوەی فەرمی شاندێک بنێرینە سەردانیان و داوای ڕوونکردنەوە بکەین.
سەر لە بەیانی ڕۆژی دووشەممە، ١٥ی حەوتی ٢٠٢٤، لە کاتێکدا ئەکرەم ساڵح بەرپرسی لقی ٢٢ی گەرمیانی پارتی دیموکراتی کوردستان ویستوویەتی لە شوێنی حەوانەوەی خۆیەوە لە گەڕەکی شەھیدانی کەلار بەرەو لق بڕوات، لەوکاتەدا بۆمبە لکێنراوەکە بە ئۆتۆمبێلەکەیدا تەقیوەتەوە.