ھەولێر-KDP.info- بەڕێوەبەری فەرمانگەی کاروباری ھونەری لە دەستەی ژینگەی ھەرێمی کوردستان ڕایدەگەیەنێت، زۆرینەی پاڵاوگە نایاساییەكان داخراون و ھەر پاڵاوگەیەک بیەوێت دامەزرێت و مۆڵەت وەربگرێت، پێویستە ڕەزامەندی لە نۆ شوێن وەربگرێت، ئەگەر نا ناتوانێت مۆڵەتی پێ بدرێت.
ئازاد نووری عەوڵا، بەڕێوەبەری فەرمانگەی کاروباری ھونەری لە دەستەی ژینگەی ھەرێمی کوردستان، لە لێدوانێكی تایبەتدا بە ماڵپەڕی فەرمیی پارتی دیموکراتی کوردستانی ڕاگەیاند: لە پارێزگای ھەولێر کۆمەڵێک پاڵاوگەی نایاسایی داخراون، بەھۆی پابەندنەبوون بە ڕێنماییەکان، چونکە بەپێی ڕێنمایی ژمارە یەکی ساڵی ٢٠٢٠ی وەزارەتی سامانە سرووشتییەکان، پێویستە بۆ وەرگرتنی مۆڵەت پاش سامانە سرووشییەكان، ڕەزامەندیی وەزارەتی شارەوانی و گەشتوگوزار، دەستەی ژینگە، کارەبا و چەند شوێنێکی دیکە وەربگرێت، چونکە ناتوانن بە ئاسانی مۆڵەت وەربگرن و زیان بە ژینگە بگات.
ئەوەشی گوت: ئەو پاڵاوگانەی ئێستا هەن، پێویستە مۆڵەتەكانیان نوێ بکەنەوە و ڕێنماییەکان جێبەجێ بکەن، ئەمەش وای كردووە ئێستا زۆرینەی پاڵاوگەکان نەماون و داخراون و ڕێژەیەکی کەمیان ماوە.
ئازاد نووری عەوڵا ڕوونیشیكردەوە: پێشتر ئەو پاڵاوگانە بەھۆی ئەوەی ڕێگەی ھاوردەکردنی سووتەمەنی کەم بوو پێویستمان پێی ھەبوو، بە مەرجی كەمتر دانرابوون، بەڵام ئێستا بەنزین و سووتەمەنی ھەیە و پێویست ناکات ئەو جۆرە پاڵاوگانە كە ڕەچاوی مەرجەكان ناكەن بمێنن.
بەڕێوەبەری فەرمانگەی کاروباری ھونەری لە دەستەی ژینگە جەختیش دەکاتەوە: بەردەوام کار دەكەین بۆ ئەوەی پاڵاوگەی نایاسایی نەمێنێت و دابخرێن، ھەر لەو ماوەیەدا نزیکەی حەوت پاڵاوگەی دیکە داخران.
بڵند ئیبراھیم