ھەولێر-KDP.info- بریکاری وەزارەتی خوێندنی باڵا وتوێژینەوەی زانستیی حکوومەتی ھەرێمی کوردستان گوتی: سەرجەم ناوەکانی سێ یەکەمەکانی سەر ئاستی زانکۆ و پەیمانگاکانی ھەرێمی کوردستان بۆ دامەزراندن ڕەوانەی وەزارەتی دارایی کراوە و ھەموو ڕێکارەکانی پێویست ئەنجامدراون.
دکتۆر عەبدولفەتاح عەبدولڕەزاق، بریکاری وەزارەتی خوێندنی باڵا وتوێژینەوەی زانستیی حکوومەتی ھەرێمی کوردستان، بۆ ماڵپەڕی فەرمیی پارتی دیموکراتی کوردستان گوتی، ئێمە وەکوو وەزارەتی خوێندنی باڵا سەرجەم ناوی سێ یەکەمەکانی سەر ئاستی زانکۆ و پەیمانگاکانمان ڕەوانەی وەزارەتی دارایی حکوومەتی ھەرێمی کوردستان کردووە و ھەندێک ناو کێشەیان ھەبوو ئەوانیش چارەسەر کراون و نێردران، بۆیە ئەوەی لەسەر ئێمە پێویستە ھەموو ڕێکارەکانمان تەواو کردووە و ساڵانە زیاتر لە ھەزار دەرچووی یەکەمەکانمان ھەیە، بۆیە ئەوانیش وردبینی بۆ دەکەن و دواتر ڕەوانەی بەغدا دهکرێن.
دکتۆر عەبدولفەتاح عەبدولڕەزاق گوتیشی: ھەرکاتێک ناوەکان ڕەوانەی بەغدا بکرێن لە ڕێگەی نوێنەرایەتیی حکوومەتی ھەرێمی کوردستان بەردەوام بەدواداچوونی بۆ دەکرێت بۆ دامەزراندنیان و بەردەوامیش دەبین تاوەکو سەرجەمیان دامەزرێن، چونکە ئەوانە مافی خۆیانە دامەزرێن، بۆیە بەردەوام لەسەر خەت دەبین و ھەر زانیاری و داواکارییەکیان ھەبێت، بۆیان ڕەوانە دەکەین، بۆیە گەشبینین کە ھەمووان دامەزرێن.
وتیشی، ڕەوانەکردنی ناوەکانیش لە ڕێگەی وەزارەتی دارایی و ئەنجومەنی وەزیران دەبێت و ڕەنگە بەھۆی زۆری ناوەکانیش ھەمووان بەیەکجار دانەمەزرێن و بەپێی پێویستی و بەقۆناغ دامەزرێن.
بڵند ئیبراھیم