Helebce-KDP.info- Serokê Hikûmeta Herêma Kurdistanê li Havîngeha Ehmed Awayê ya girêdayî qezaya Xurmalê di hevdîtina hejmareke kesatiyên Helebce, Şarezûr û Hewramanê de ragehand, “Em xizmetkirina xelkê Kurdistanê wekî erkê xwe yê serekî dibînin.”
Serokê Hikûmeta Herêma Kurdistanê Mesrûr Barzanî îro Yekşema 30.06.2024 di çarçoveya serdana xwe ya ji bo parêzgeha Helebceyê de, li Havîngeha Ehmed Awayê ya girêdayî qezaya Xurmalê bi hejmareke zêde ya kesatiyên Helebce, Seyid Sadiq, Pêncwîn, Şarezûr û Hewramanê re civiya.
Serokwezîr Mesrûr Barzanî di wê hevdîtinê de gotarek pêşkêş kir û amaje da giringiya devera Hewramanê, ku dîrokeke diyar di xebat û tekoşîna gelê Kurdistanê de heye û devereke geştyarî ye jî.
Mesrûr Barzanî herwesa got, “Em xizmetkirina xelkê Kurdistanê wekî erkê xwe yê serekî dibînin. Pêxemetî zêdetir pêşxistina vê deverê û berdewamkirina karnameya hikûmetê di warên hemerengkirina aborî û peydakirina derfetên karî ji bo ciwanên me de, em dê hemî bizavan bikin.”