Bexda-KDP.info– Berpirsekî serbazî ragihand, paşmayên rêxistina terorîst a DAIŞê hîn li nava Iraqê mane û metirsî ne li ser aramiya Iraqê.

Fermandar Adil Cebar Zengene Nûnerê Wezareta Pêşmerge di Fermandehiya Operasyonên Hevbeş de li Bexdayê ji malpera fermî ya Partiya Demokrata Kurdistanê (PDK) re ragihand: “Hemû alî dizanin ku dawiya DAIŞê nehatiye û paşmayên wê li nava Iraqê mane, lê pir qels in. Lê dîsa jî metirsiya wan terorîstan li ser aramiya Iraqê maye, ku carnan dixwazin nîşan bidin ku bi dawî nebûne, lê şiyana wan nîne ku cih û navçeyan bigrin, tenê dikarin kiryarên terorîstî pêk bînin.”

Derbarê wan navçeyên ku terorîstên DAIŞê tê de xwe veşartine, wî berpirsê Wezareta Pêşmerge wiha got: “Li gelek deverên Iraqê paşmayên çekdarên DAIŞê hene, bi taybetî li navçeyên parêzgeha Selahedîn, derdora Bexda, Kerkûk û hin deverên din.”

Adil Cebar Zengene wiha got: “Bicîhkirina lîwayên hevbeş dê bandorê li ser sînordarkirina tevgera çekdarên DAIŞê bike, ji ber ku em niha lîwayên hevbeş li navçeyên ku valahî û metirsî lê hene bicîh dikin, lewra ew dê bibe sedemek sereke ji bo nemana derfetê ji wan terorîstan re.”