خانەقین KDP.info ئەندامی پێشووی ئەنجومەنی پارێزگای دیالە گوتی، ناوچە کوردیەکان لە لایەن حکومەتی عێراق پشتگوێخراون و خزمەتیان نەکراوە وچاوەرێ دەکەین ئەمجارە کورد زۆرترین  نوێنەری هەبێت بۆ ئەوەی چیتر غەدر لە خانەقین نەکرێت و خزمەتیان بکرێت.

عامر رەفعەت ، ئەندامی پێشووی ئەنجومەنی پارێزگای دیالە ، بۆ ماڵپەڕی فەرمیی پارتی دیموکراتی کوردستان گوتی ، پرۆسەی بانگەشەی هەڵبژاردن بۆ لیستی 197ی پارتی دیموکراتی کوردستان بەردەوامە و باش بەرێوەدەچێت و بێ گرفتە، بەڵام هەندێک جیاوازی هەیە لەگەڵ ناوچەکانی دیکە بەهۆی ئەوەی هیچ گرنگی لە لایەن حکومەتی عێراق بەو ناوچانە نەدراوە وخەڵک پشتگوێ خراوە، بەتایبەت دوای 16ی ئۆکتۆبەر تا ئێستا بەسەر کورد هاتووە وتەعدایەکی زۆریان لێ کراوە، بۆیە چاوەڕوانین  خەڵک ئەمجارە دەنگ بەکاندیدانی کورد بدات بۆ ئەوەی سەرکەون و بتوانن لەئەنجومەنی پارێزگای دیالە خزمەتی کورد بکەن.

عامر رەفعەت گوتیشی، بەداخەوە پارتی لەو سنوورە وەکو پێویست دەسەتی نەبووە و خزمەتی ئەو ناوچەش نەکراوە ،چونکە زیاتر خزمەتی ناوچە عەرەبیەکان دەکرێت لە رێگەی نوێنەرانی خۆیان، بۆیە چاوەرێ دەکەین کورد ئەمجارە  نوێنەری زۆر بێت لە ئەنجومەنی پارێزگای دیالە و بتوانن خزمەتی ناوچە کوردیەکانیش بکرێت، چونکە خەڵکی ئەو ناوچانە خەڵکی کورد پەروەر ونیشتیمان پەروەرن و نەتەوەپەرستن.
رەفعەت باسی لەوەشکرد ، ئێمە بەردەوام کار دەکەین بۆ کاندیدانی خۆمان بۆ ئەوەی بتوانین دەنگێکی زۆر بەدەست بێنین، چونکە سنووری خانەقین زۆر مەغدورن لە خزمەت گوزاری، بۆیە زۆر بەگەرموگوڕی کار دەکەین بۆ ئەوەی سەنگی کورد لەناوچەکە هەبێت و دەستەڵات بۆ کورد بگەڕێتەوە وخزمەتی ئەو ناوچانە بکرێت، لەبەر ئەوەی ناسنامەی ئەو ناوچانە کوردستانییە  ،بۆیە هەوڵدەدەین کاندیدمان دەربچێت و نوێنەرمان لەئەنجومەنی پارێزگای دیالە هەبێت، بۆیە پێویستە بەجدی کاری لەسەر بکەین و زۆرترین دەنگ بە دەست بێنین، بۆ ئەوەی سەرکەوتنی گەورە بەدەست بێنین.
بڵند ئیبراهیم