ڕوڤیا _KDP.info_ بەڕێوەبەری کارگێڕی کارگەی ئاوی ڕوڤیان لە ناحیەی ڕوڤیا گوتی: کارگەی ئاوی ڕوڤیان 15ساڵە دامەزراوە و بەردەوامیش لە فراوان بوون دایە، ئێستا ئاو بۆ شارەکانی هەرێمی کوردستان و عێراق دابین دەکات و زیاتر لە 100 کرێکار بە بەردەوامی کاری تێدا دەکەن و بۆتە سەرچاوەی بژێوی ژیان بۆ دەیان خێزان، پلانیشمان هەیە فراوانتری بکەین و کرێکاری زیاتر کاری تێدا بکەن، چونکە ئێستا 24 سعات کاردەکات.

جەمیل عەزیز محەمەد، بەڕێوەبەری کارگێڕی کارگەی ئاوی ڕوڤیان بۆ  ماڵپەڕی فەرمیی پارتی دیموکراتی کوردستان گوتی: لەساڵی 2008وە دەست بە دروستکردنی کارگەی ئاوی ڕوڤیان کرا لە 2010ش دەست بە کارکردنی کارگە کرا و بەرهەمی کەوتە بازاڕی هەرێمی کوردستان و عێراقیش، سەرەتا تەنیا نیولتری بەرهەم دەهێندرا، دواتر فراوانکرا و لترونیو و قەزەمیش زیادکرا، سەرەتا کارگە ڕۆژانە هەشت سعات کاری دەکرد دواتر بووە 24 سعاتی، ئێستا چەند جۆرێک ئاو بەرهەم دێنین و بۆ شارەکانی کوردستان و عێراق دەنێرین، ڕۆژانە 24 ئۆتۆمبێلی بارهەڵگر بەرهەممان هەیە و بەسەر شارەکاندا دابەش دەکرێت.
جەمیل عەزیز محەمەد گوتیشی: بریکاری زۆرمان هەیە و داواکاریێکی زۆر لەسەر ئاوەکە هەیە لە هەرێم و لە عێراقیش، بۆیە بازاڕی باشە ئەوەش بۆ ئەوە دەگەڕێتەوە ئاوەکەی خاوێنە و تامیشی جیاوازە، سەرەڕای ئەوەی نرخی لە ئاوەکانی دیکە گرانترە، بەڵام خواستی زیاتری لەسەرە، ئێمە گرنگی زۆر بە پاکوخاوێنی دەدەین و تەندروستییش بەردەوام چاودێری دەکەن.
محەمەد باسی لەوەش کرد: نزیکەی 130 کەس لەو کارگەیە کار دەکەن و بەردەوام لە 100 کەس زیاتر کاردەکەن و زۆرینەش  کرێکاری ناوخۆیین و 10%ی کرێکاری بیانین، ئەوانیش لێرە ئەو پسپۆرییانەمان نییە، ئەگەر هەبێت ئەویش دەکرێنە کرێکاری ناوخۆیی و هەمووشی دەستەبەری کۆمەڵایەتییان هەیە، پلانیشمان هەیە کارگەکە فراوانتر بکەین، چونکە خواستی زۆر لەسەر ئاوەکە هەیە، زۆر گرنگە ئەو جۆرە کارگانە هەبن چونکە هەم گرنگی دانە بە کەرتی پیشەسازی هەم دەرفەتی کاریش بۆ دەیان خێزان لەناوچەکە دەڕەخسێنێ و بژێوی ژیانیان لەسەر ئەو کارگەیەیە، بۆیە هیوادارین گرنگی زیاتر بە کەرتی پیشەسازی بدرێت.

بڵند ئیبراهیم