ئەمڕۆ شەش ساڵ بەسەر پرۆسەی ڕیفراندۆمی ھەرێمی کوردستاندا تێدەپەڕێت و ھاووڵاتییانیش ئەم یادە بەرز ڕادەگرن، دەشڵێن: ھەزار جار ئامادەین بۆ ڕیفراندۆم و سەربەخۆیی کوردستان.
نەوزاد حاجی شووشە، ھونەرمەندی شاری ھەولێر بۆ ماڵپەڕی فەرمیی پارتی دیموکراتی کوردستان گوتی: بۆ سەربەخۆیی کوردستان و دروستبوونی دەوڵەت ھەمیشە ئامادەم بۆ دەنگدان، تا کوردیش وەک میللەتانی دیکەی جیھان ببێتە خاوەن کیانی سەربەخۆ، کێ ھەیە کوردبێت و حەزنەکات ببێتە خاوەن دەوڵەتی خۆی، وەک ھونەرمەندێک ئامادەم بەخوێن دەنگ بدەم لەپێناو بەدیھێنانی دەوڵەتی کوردی.
دەریا شێروانی چالاکوانی مەدەنی لە ئیدارەی سەربەخۆی سۆران بە ماڵپەڕی فەرمیی پارتی دیموکراتی کوردستانی راگەیاند: ڕیفراندۆم یەکێکە لە دەستکەوتە مەزنەکانی گەلی کورد و لە ڕۆژی ٢٥ی ئەیلوول میللەتی کورد بڕیاری خۆی ئاشکراکرد، چیدی ئامادەنییە ژێردەستە بژیت، تا میللەت نەگات بە ئامانج شۆڕش و تێکوشان کۆتایی نایەت و ھەزار جاری دیکەیش دووبارە بکرێتەوە ھەر دەڵێین بەڵێ بۆ ڕیفراندۆم و سەربەخۆیی کوردستان.
کارۆخ محەمەد، گەنجێکی دیکەی شاری ھەولێرە، ئەویش بۆ ماڵپەڕی فەرمیی پارتی دیموکراتی کوردستان گوتی: لە رۆژی ٢٥ی ئەیلوولی ساڵی ٢٠١٧ کە ڕۆژی بەڕێوەچوونی ڕیفراندۆم بوو بەھۆی تەمەنمەوە نەمتوانی بەشداری پرۆسەکە بکەم و ئەو شانازییەم پێ نەبڕا، ئێستا حەز دەکەم مێژوو دووبارە ببێتەوە بۆ ئەوەی منیش وەک گەنجێک بەشداری ریفڕاندۆم بکەم و بۆ ھەتا ھەتایی شانازی بەخۆمەوە بکەم.
قائید میرۆ