ھەولێر-KDP.info- سەرۆکی پێشووی ئەنجوومەنی پارێزگای کەرکووک پێیوایە ئەنجامدانی ریفڕاندۆم جێگەی شانازیە بۆ کوردستان و دەڵێ، تا سەد ساڵی دیکەش شانازی پێوە دەکەین و دەبێتە خاڵی وەچەرخان بۆ ئایندەی کورد.
رێبوار تاڵەبانی، سەرۆکی پێشووی ئەنجوومەنی پارێزگای کەرکووک، بە ماڵپەڕی فەرمیی پارتی دیموکراتی کوردستانی راگەیاند: "ئەگەر شتێک ھەبێت لە سەد ساڵی رابردوو کورد شانازی پێوە بکات ئەوە ریفڕاندۆمە، واتە ریفڕاندۆم دەبێتە خاڵێکی وەچەرخانیش بۆ سەد ساڵی ئایندە، چونکە ھەموو کورد دڵی پێی خۆشە، بەتایبەتی بۆ شاری کەرکووک لەبەر ئەوەی کورد شۆڕشێکی لەسەر کەرکووک داناوە و لە ساڵی 1975 کورد ئامادە نەبوو سازش لەسەر کوردستانیەتی کەرکووک بکات".
سەرۆکی پێشووی ئەنجوومەنی پارێزگای کەرکووک دەشڵێت: "لە ریفڕاندۆم کەرکووک بەشێوەیەکی فەرمیی و دیموکراتی گەڕایەوە سەر ھەرێمی کوردستان، ھاوکات رێژەی بەڵێ لە ریفڕاندۆم لە کەرکووک 83% بوو، ئەو ڕۆژە لەبیر ناکرێت خەڵکی بەشێوەیەکی یاسایی و ئاسایی توانی دەنگی خۆیان بدەن بۆ سەربەخۆیی، کە کورد تاکە میللەتە لەسەرتاسەری جیھان ھەشتا ملیۆنە و دەوڵەتی نیە".
رێبوار تاڵەبانی ئاماژەی بۆ ئەوەکرد: "بڕیاربوو لە 2007/12/31 ڕاپرسی لەبارەی چارەنووسی کەرکووکەوە بکرێت، بەڵام حکوومەتی عێراق ئامادە نەبوو ڕاپرسیەکە ئەنجامبدرێت و سەرۆک بارزانی کە ئەوکات سەرۆکی ھەرێمی کوردستان بوو لەپەرلەمان گوتی، ئەگەر ئەو دواخستنە ھۆکاری ھونەری بێت ئەوە دەکرێت قسەی تێدا بکەین، بەڵام ئەگەر ھۆکارەکان ھونەری نین جێی قبوڵکردن نیە، ھەر قسەی سەرۆکیش دەرچوو چەندین جار ئەو پرۆسەیە دواخرا و لە مانگی ئاداری 2017 بە فەرمیی وەک ئەنجوومەنی پارێزگای کەرکووک داوامان لە عەبادی کرد ڕاپرسی لەکەرکووک بکرێت کە ئەوکات بەفەرمیی ڕەتیکردەوە و عێراق ئامادە نەبوو پرۆسەکە بەڕێوەببرێت، ئەوەبوو ئێمە داوامان لە ھەرێمی کوردستان کرد لە ریفڕاندۆم بەشداری بکەین".
لە 25/9/2017، ریفراندۆمی خەڵكی كوردستان بۆ سەربەخۆیی بەڕێوەچوو، تێیدا 4 ملیۆن و 561 هەزار و 255 كەس لە هەرێمی كوردستان و ناوچە كوردستانییەكان مافی دەنگدانیان لە ریفراندۆم هەبوو، 3 ملیۆن و 305 هەزار و 925 كەس بەشداریان لەو راپرسییەدا كرد، كە دەكاتە زیاتر لە 72%، لە ریفراندۆم 2 ملیۆن و 861 هەزار و 471 كەس بە بەڵێ دەنگیان بۆ سەربەخۆیی كوردستان دا كە دەكاتە زیاتر لە 92%.
قائید میرۆ