فراکسیۆنی پارتی لە پەرلەمانی عێراق سەردانی وەزارەتی نەوتی عێراقیان کرد، ئەندامێکی شاندەکەی پارتیش دەڵێ: لێک تێگەیشتنی باش ھەیە لەسەر کۆی پرسەکان و وەزیری نەوت بەڵێنی دروستکردنی لیژنەیەکی پێداین بۆ پێداچوونەوە بە نرخی تێچووی دەرھێنانی نەوتی ھەرێم.
د.سەباح سوبحی، ئەندامی لیژنەی نەوت و غاز لە پەرلەمانی عێراق بە ماڵپەڕی فەرمیی پارتی دیموکراتی کوردستانی راگەیاند: فراکسیۆنی پارتی سەبارەت بە چەند پرسێک سەردانی وەزارەتی نەوتی عێراقی کردووە، لەوانە پرسی دەستپێکردنی ھەناردەکردنی نەوتی ھەرێمی کوردستان لەڕێگەی تورکیا، پرسی دەرھێنانی نەوت لە ھەرێمی کوردستان، لێک تێگەیشتنی باش ھەیە لەنێوان ھەرێم و بەغدا لە سەر کۆی پرسی نەوت و غاز.
ئەندامەکەی لیژنەی نەوت و غاز گوتیشی: لەبارەی پرسی ھەناردەکردنی نەوت داوامان کرد عێراق ھەوڵەکانی زیاتر بەگەڕ بخات بۆ دەستپێکردنەوەی ھەناردەکردنی نەوتی ھەرێم لەڕێگەی بەندەری جەیھانی تورکیا، چونکە ڕاگرتنی نەوتی ھەرێم تەنیا زیانی بە ھەرێم نەگەیاندووە بەڵکو زیانی بە عێراقیش گەیاندووە، سەرەتا تورکیا جدی بوو لەسەر مەرجەکانی، ئێستا تورکیاش لای خۆیەوە کرانەوەی باشتری ھەیە بۆ ھەناردەکردنی نەوتی ھەرێم کە رۆژانە ٤٨٠ ھەزار بەرمیل ھەناردە دەکرێت، بەتایبەتی ئێستا بۆڕی نێوان ھەرێم و تورکیا ئامادەیە بۆ ھەناردەکردنی نەوت.
د.سەباح سوبحی ئاماژەی بۆ ئەوەکرد: ئێمە داوامان کرد ئەو پارەیەی بۆ دەرھێنانی نەوت لە ھەرێمی کوردستان خەرج دەکرێت پێداچوونەوەی بۆ بکرێت، لەبەر ئەوەی وەزارەتی نەوتی عێراق شەش دۆلاری داناوە بۆ دەرھێنانی ھەر بەرمیلێک نەوت لە ھەرێمی کوردستان، ئەوەمان بە وەزیری نەوتی عێراق ڕاگەیاند کە تێچووی دەرھێنانی نەوت لە ھەرێم لە ناوچەکانی دیکەی عێراق زیاترە، ئەویش بەڵێنی ئەوەی پێداوین لیژنەیەک پێکبهێندرێت و پێداچوونەوە بە نرخی دەرھێنانی نەوت بکرێت.
قائید میرۆ