ئالان پیرێ، شڕۆڤەکاری دیاری سیاسیی دەڵێت: ئەو ڕێککەوتنانەی بۆ چارەسەری دۆخی ڕۆژئاوای کوردستان لە ژێر چادوێری سەرۆک بارزانیدا کرابوون گەلێک گرنگ بوون، دەبواییە جێبەجێ بکرێن، دەبێت بەڕێوبەری خۆسەریش نەرمی بنوێنێت لەگەڵ ئەو پارت و سیاسییانەی لەگەڵ ئەوان جیاوازن، بۆ ئەوەی ئەوانیش کار و خەباتی سیاسیی خۆیان بکەن.
ئالان پیرێ، بۆ ماڵپەڕی فەرمیی پارتی دیموکراتی کوردستان گوتی: دەبوایە ئەم ڕێککەوتنانە جێبەجێ کرابان و دواتر بۆ هەموو شتێک دەتوانرا گۆڕانکاری لە نێویاندا بکرێت، چونکە ئێستا زۆر لایەن و گروپ لە سوریا هەنە، هەرچەندە پێدەچوو ئەم ڕێککەوتنە ئاڵۆزی بە خۆییەوە دیتبا بەڵام بۆ کورد گرنگییەکی گەورەی هەبوو و دەیتوانی کوردەکان یەکبخات.
گوتیشی: ئێستا ئەنەکەسە لە دەرەوە کاری سیاسەت دەکات، بەڕێوەبەری خۆسەریش لەسەر ئەرد کاری بەڕێوەبردن دەکات، ئەم دووانە ئەگەر یەکگرتووبوونایە دەبوونە تەواوکەری یەکتری، بۆ لێک نزیکبوونەوەیان هەوڵەکانی سەرۆک بارزانی و مەزڵووم عەبدیش هەبوون، ئێستاش تاکە چارەسەر گەڕانەوەیە بۆ ئەو تیڕوانینە.
سەرۆک مەسعود بارزانی، لە کتێبی نوێ (بارزانی و بزووتنەوەی ڕزگاریخوازی کورد) بەرگی شەشەم ٢٠٠٣-٢٠١٦ـدا کوردستان و عێراقی نوێ ''بەشی دووەم'' ــدا، باسی ڕێککەوتنی ئەنەکەسە و پەیەدە دەکات لەگەڵ هەردوو لایەنی ئەنەکەسە و تەڤدەم(پەیەدە) کۆبوومەوە، لە کۆبوونەوەکەدا پێمڕاگەیاندن پێویستە هەردوولاتان یەکگرتوو و یەکهەڵوێست بن لەسەر میکانزمی هاوبەشی کارکردن ڕێکبکەون بۆ ئەوەی بتوانین زیاتر هاوکاریتان بکەین و یارمەتیتان بدەین.
لە ڕۆژی ٢٢ی تشرینی یەکەمی ساڵی ٢٠١٤ـدا لە دهۆک ڕێککەوتنی هەردوولا ئیمزاکرا و ئێمەش لە ڕێوڕەسمی ئیمزاکردنی ڕێککەوتنی ئەنەکەسە و پەیەدەدا ئامادەبووین بەڵام بەداخەوە لەگەڵ گەیشتنەوەیان بۆ ئەودیوی ڕووباری دیجلە، پەیەدە پاشگەزبووەوە و هەمان هەڵسوکەوت و ڕەفتاری پێشوویان دووبارە کردەوە و ڕیککەوتنەکەی تێکدا و هەڵیانوەشاندەوە.
پیرێ ئاماژەیشیدا: ئێستاش دەرگاکان کراوەن بۆ نزیکبوونەوەیان چونکە لە ساڵی ٢٠١٢ ـەوە سەرۆک بارزانی کاری بۆ نزیکبوونەوەیان کردبوو و دەستپێشخەریشیان کرد بۆ ئەنەکەسە و پەیەدە، ئەگەر نزیکی یەک بن دڵی سەرۆک خۆش دەبێت، دواتر هەوڵی تریش هەبوو لەم ساڵانەی دواییدا.
لە کۆتاییشدا گوتی: پێویستە ئیدارەی خۆسەر لەگەڵ ئەنەکەسە خۆی نزیک بکاتەوە چونکە دۆخی سوریا نائارامە و ئەمە دەبێتە هێزێک بۆ تەڤگەری سیاسیی کورد لە سوریا، چارەسەری کێشەی کوردیش لەو وڵاتەدا پێوستی بە چارەسەری دۆخی سوریایە، لەسەر هەردوو لایەن پێویستە دەستپێشخەری بکەن و ئەم هەلە لەدەست نەدەن.
کـــاروان باعەدری