بەریتانیا-KDP.info- ساڵانە کۆنفرانسی رێکخراوی پارتە دیموکراتخوازەکان ئەنجام دەدرێت و پارتی دیموکراتی کوردستان بەشداری کارای ھەیە ئەمیش بەئامانجی گەیاندنی پەیام و سیاسەتی سەرۆک بارزانی و پشتیوانی زیاتر بۆ دۆزی ڕەوای گەلی کوردستان، ھەروەھا کۆنفرانسی ئەمساڵ لە بەریتانیا ئەنجامدرا و ھۆشیار سیوەیلی سەرۆکایەتی شاندی پارتی دیموکراتی کوردستانی کرد.
لە میانەی ئەو کۆنفرانسەدا شاندی پارتی پێکھاتبوون لە ھۆشیار سیوەیلی و علی پشدەری، کە چەندین دیدار و کۆبونەوەیان ئەنجامدا بە ئامانجی بەھێزکردنی پەیوەندییەکان و گفتوگۆ لە بارودۆخی ئێستای جیھان بە گشتی و ڕۆژھەڵاتی ناوەڕاست بە تایبەتی و ئەو رووداوانەی کە کاریگەریان بەسەر ڕەوشی گەلی کوردستان و ھەرێمی کوردستان ھەیە.
لە میانەی ئەو دیدارانەدا جەخت لەسەر پیادەکردنی رێگای دیموکراسی کرایەوە بۆ ئەوەی سەقامگیری زیاتر لە جیھاندا دروست بێت و گەلانی جیھان بتوانن لە ئارامیدا بژین و پەرەسەندنی ئابووری و کۆمەڵایەتی بەردەوامبێت.
بەشێکی دیکەی دیدارەکان پەیوەست بوون بەو گرفت و کێشانەی کە ئێستا بووەتە لەمپەر لەبەردەم گەشەسەندن و گفتوگۆ بۆ بەھێزکردنی ھەماھەنگی بۆ دۆزینەوەی چارەسەر بۆیان، ھاوکات پەیوەندییە نێودەوڵەتییەکانی ئێستای جیھان و جەنگی رووسیا و ئۆکرانیا و پەیوەندی نێوان چین و ئەمریکا کاریگەریان بەسەر بارودۆخی جیھان ھەیە لە تەواوی بوارەکاندا.
لە پانێڵی کۆنفرانسەکەدا بەشداربووان باسیان لە ئەزموونی پێشکەوتن و گرفتی وڵاتانی خۆیان کرد، زۆربەی گرفتەکانی ئێستای وڵاتانی جیھان کاریگەری دەرەوەی سنوورەکانیان لەسەرە بۆیە بەشداربوان پێیان وابوو دەبێت ھەماھەنگی زیاتر ھەبێت بە ھاوبەشی رووبەڕویان ببنەوە، ھەروەھا بەشداربووانی کۆنفرانسەکە پێکھاتبوون لە چەندین کەسایەتی سیاسی و دیبلۆماتی دیاری جیھان لە نێوانیاندا ( Kolinda Grabar) سەرۆکی پێشووی کرواتیا و (Boris Johnson) سەرۆکوەزیرانی پێشووی بەریتانیا، و ( Stephen Harper) سەرۆکوەزیرانی پێشووی کەنەدا، و ( John Howard) سەرۆکوەزیرانی پێشووی ئوسترالیا، (Lord William Hague)، و ( Petro Poroshenko) سەرۆکوەزیرانی پێشووی ئۆکرانیا، و (Ben Hodges) سەرۆکی پێشووی سوپای ئەمریکا لە وڵاتانی ئەوروپا، و ( Mikulas Dzurina) سەرۆکوەزیرانی پێشووی سلۆڤاکیا، و (Sebastian Kurz) راوێژکاری پێشووی نەمسا، و (Erna Solberg )سەرۆکوەزیرانی نەرویج، و (Joharnnes Hahn) سەرۆکی پێشووی بڕیاردەری میزانیەی ئەوروپا و (Ranil Wickremesinghe) سەرۆکی سیرلانکا، و (Sebastian Pinera) سەرۆکوەزیرانی پێشووی چیلی، و ( Oleksii Goncharenko) ئەندام پەرلەمانی ئۆکرانیا، و ( Mohand Nasheed) سەرۆک پەرلەمانی مالدیف، و( Lord Michael Ashcroft) سەرپەرشتیاری (IDU) ، و ( Christopher Sununu) پارێزگاری ولایەتی ھەمشیری ئەمریکا، و ( Michael R.Pompeo) وەزیری دەرەوەی پێشووی ئەمریکا، و ( Jmes Cleverly) ئەندام پەرلەمان و وەزیری دەرەوەی بەریتانیا.
جێگای ئاماژەیە رێکخراوی IDU لە ساڵی ١٩٨٣ لە بەرلینی پایتەختی ئەڵمانیا دامەزراوە و بارەگای سەرەکیان لە میوشنە، پێکھاتووە لە پارتە سیاسیەکانی(Center Right) ناوەندی میانرەو کە ٨٤ ئەندام لە خۆی دەگری و ٦٥ دەوڵەت بەشداری دەکات بە سەرپەرشتی (Stephen Harper) سەرۆکوەزیرانی پێشووی کەنەدا، وە لە ئەنجامی یەکگرتنەوەی دوو رێکخراوی نێودەوڵەتییە کە رێکخراوی ژنانی دیموکراسی و رێکخراوی گەنجانی دیموکراسین لەگەڵ ٦ رێکخراوی ڕەسەن کە پێکھاتوون لە ( یەکێتی ئەمریکای لاتینی و یەکیتی ئاشتی دیموکراسی ئاسیا و یەکێتی دیموکراسی کاربیاو یەکێتی دیموکراسی ئەفریقا و پارتی گەلی ئەوروپی و پارتی پارێزگاران و ریفۆرمخواز، کە لە وڵاتی بەریتانیا شاری لەندەن بە شداریان کرد لە بۆنەی بیرەوەی چل ساڵەی ( IDU ) کە ٣ ڕۆژی خایاند.