بەغدا -KDP.info- جێگری سەرۆکی لیژنەی مافی مرۆڤی پەرلەمانی عێراق ئاشکرای کرد، پرۆژەیاسای لێبووردنی گشتی ئامادە دەکرێت، بەڵام سەرەتا لێبووردنی گشتی بۆ ژنانی ناو چاکسازییەکانی عێراق دەر دەکرێت، لەبەر ئەوەی ڕەوشیان زۆر خراپە و پێویستیان بە لێبووردنێکی گشتی ھەیە .
جوان عەبدوڵڵا، جێگری سەرۆکی لیژنەی مافی مرۆڤی پەرلەمانی عێراق، بە ماڵپەڕی فەرمیی پارتی دیموکراتی کوردستانی ڕاگەیاند: "پرۆژەیاسای لێبووردنی گشتی ئامادە دەکرێت و لیژنەی مافی مرۆڤ خەریکی ئامادەکردنی پرۆژەکەیە و لایەنە پەیوەندارەکانیش ڕەزامەندن لەسەر دەرکردنی پرۆژەیاسای لێبووردنی گشتی، بەڵام سەرەتا لێبووردنی گشتی بۆ ژنانی ناو چاکسازییەکانی عێراق دەر دەکرێت، لەبەر ئەوەی ڕەوشیان زۆر خراپە و پێویستە لێبووردنێکی گشتی بۆ ئەوان دەر بکرێت.''
جێگری سەرۆکی لیژنە مافی مرۆڤ دەشڵێت: "ڕەوشی ژنانی ناو چاکسازییەکانی عێراق بەگوێرەی پێویست نییە، چونکە یان تەمەنیان ھەڵکشاوە، یان ھەندێ نەخۆشی لەناویاندا بڵاو بووەتەوە و بە ھەر جورێک بێت نەخۆش بوونە و ڕەوشی چاکسازییەکان کاریگەرییان ھەبووە.''
جوان عەبدوڵڵا ڕوونی کردەوە: "نەک تەنیا چاکسازییەکانی ژنان لە عێراق وەک پێویست و بەگوێرەی ستانداری جیھان نین، بەڵکوو چاکسازیی پیاوانیش بە ھەمان شێوە پێویستی بە پێداچوونەوە ھەیە و دەبێت ڕەوشی چاکسازییەکان باشتر بکرێت لەوەی ھەیە، ئێمە کار بۆ باشترکردنی چاکسازییەکان دەکەین و لێبووردنی گشتی دەر دەکرێت.''
قائید میرۆ