كاڤین شیخ سعید*
بڕیارا دادگه‌ها فیدرالی سه‌باره‌ت هه‌لوه‌شاندنا هه‌می وان رێككه‌فتنێن دناڤبه‌را حكومه‌تا ئێراقى و هه‌رێما كوردستانێ دا هاتینه‌كرن و نه‌هنارتنا گوژمێ دووسه‌د ملیار دینارا ژ موچێ فه‌رمانبه‌رێن هه‌رێما كوردستانێ بڕیاره‌كا ناعادیلانه و سروشته‌كێ شوڤینیه‌تى پێڤه دیاره، پرانیا خه‌لكێ هه‌رێمى دژى ڤێ بڕیارا دادگه‌ها فیدرالی یه و شه‌رمزار دكه ن، به‌لكى زۆربه‌ی خه‌لكێ ئێراقێ و پارت و لایه‌نێن سیاسی ژی دژى ڤێ بڕیارێ نه و ده‌ستخوشیێ لێ ناكه‌ن.
پێتڤی بوو دادگه‌ها فیدرالی به‌ری بڕیاردانێ پێداچۆن تێدا كربا، ژبه‌ركو سزادانا خه‌لكێ هه‌رێما كوردستانێ بڤی شێوه‌یی خزمه‌تا ئێراقێ ناكه‌ت و ده‌وله‌تا ئێراقى بێی هه‌رێما كوردستانى دێ ده‌وله‌ته‌كا لاواز و بێ هێز و نه‌ئێكگرتی بیت، ئه‌و كه‌س و لایه‌نێن ل دادگه‌ها فیدرالی سكالا ل دژی هه‌رێمێ تۆمار كرین هه‌ستا نشتیمانی ل ده‌ف وان گه‌له‌ك لاواز و بێ قیمه‌ته. ئه‌گه‌ر ئه‌و كه‌س و لایه‌ن داخوازا دادوه‌ریا جڤاكی دكه‌ن ژبۆ به‌رژه‌وه‌ندیا گشتی یا ئێراقێ دڤیت بچاڤه‌كێ كێم ل وه‌لاتیێن هه‌رێما كوردستانێ نه‌نێرن، لێ یا دیاره وان هنده‌ك ئه‌جندایێت دیتر هه‌نه دخوازن حكومه‌تا هه‌رێما كوردستانێ لاواز و بێ قیمه‌ت بكه‌ن، یان ژی ئامانج پى هه‌لوه‌شاندنا قه‌وارا هه‌رێما كوردستانێیه، له‌ورا ژی پێتڤی یه دادگه‌ها فیدرالی بزانیت كو ژبه‌ر ڤان جوره بڕیار و سزادانا هه‌ڤوه‌لاتیێن كوردستانێ، دبیته سه‌ده‌ما وێ چه‌ندێ كو هه‌ڤوه‌لاتیێن هه‌رێما كوردستانێ شانازیێ ب ئێراقیبوونا خو نه‌كه‌ن و ئێراق پتر لبه‌ر چاڤێن وا سڤك و ره‌ش دبیت. د سه‌د سالێن بۆری دا كوردستان بهه‌ر ئاوایه‌كێ یا بوویه پارچه‌یه‌ك ژ وه‌لاتێ ئێراقێ، سه‌ر هندێ را كورد خودان جوگرافی و خاك و زمان و فه‌رهه‌نگ و كه‌لتوره‌كێ جودایه و تایبه‌تمه‌ندیا خو هه‌یه به‌لێ لڤان سه‌د سالێن بۆریدا و لسه‌ر هه‌می وان رژێمێن حوكمرانیا ئێراقێ كری هه‌ر ژ سه‌رده‌مێ پاشایه‌تی و هه‌تا نوكه هه‌میا زۆرداری یا دگه‌ل كوردا كری، هه‌می ئومێدا گه‌لێ كوردستانێ ئه‌و بوو پشتی ژنافچۆنا ده‌سته‌لاتداریا رژێما به‌عسا فاشست ژ زولم و سته‌مكاریێ قورتال بن و كه‌ڤنه دناڤ حوكمرانیه‌كا دادپه‌روه‌ردا، لێ مخابن خه‌لكێ هه‌رێمێ هه‌ست دكه‌ن كو هه‌مان عه‌قلیه‌تا شوفینی و زالماندا لسه‌ر حوكمرانیا ئێراقێ دا یا زاله ژبه‌ر ڤێ سیاسه‌تا دوو روی بڕیارێن ناڕه‌وا ل دژی هه‌رێمێ، پرانیا خه‌لكێ شانازیێ ب ئێراقی بوونا خو ناكه‌ن و هه‌ست دكه‌ن وه‌لاتیێن پله دوو بن، یا دیاره به‌رده‌وام دستور ل دژی هه‌رێما كوردستانێ دهێته بن پێ كرن و دادگه‌ها فیدرالی بێده‌نگیێ دهه‌لبژێریت، راسته ئه‌م هه‌رێمه‌كا سه‌ربه‌خۆینه لێ گه‌له‌ك به‌ندێن ده‌ستوری هه‌نه دبه‌رژه‌وه‌ندیا حكومه‌تا هه‌رێمێ دا یێت هاتینه ڕاگرتن، ژوانا شایستێن دارایی و بودجه و موچێ هاوولاتیا، ده‌رنه‌كرنا یاسایا نه‌فت و گاز و نه‌هنارتنا به‌شێ بودجێ هێزێن پێشمه‌رگه‌ی ژ پاره و چه‌ك و پێداویستیێن سه‌ربازی كو پێشمه‌رگه ژی به‌شه‌كه ژ مه‌نزوما به‌رگریا ئێراقى و جێبه‌جێ نه‌كرنا به‌ندا١٤٠ یا دستوری و نه‌هنارتنا به‌شێ داوده‌رمانا بۆ كه‌رتێ ساخله‌میا هه‌رێمێ و كه‌رتێ چاندنێ و جوتیارێن هه‌رێمێ و قه‌ره‌بوونه‌كرنا كه‌س و كارێن ئه‌نفالكریا و گه‌له‌ك بابه‌تێن دیتر دستوری نه و هه‌تا نوكه هه‌لاویستی ماینه كو ئه‌ڤه هه‌می پێدڤی چاره‌سه‌ركرنێ نه و دڤێت حكومه‌تا فیدرال چه‌ند پێنگاڤه‌كا بێته پێش و نه‌رماتیێ ل به‌رامبه‌ری هه‌رێما كوردستانێ بكار بینیت و دووپات دكه‌م ئه‌ڤ بڕیارا دادگه‌ها فیدرال نه تنێ دژی هه‌رێما كوردستانى یه!! هه‌مان ده‌م ئاسته‌نگ و گرێیه‌كا ئاسێ ل رێكا سه‌ركه‌فتنا كابینا حكومه‌تا به‌رێز محمد شیاع سودانی یه، له‌ورا ژی ئه‌م پشته‌ڤانیا هه‌لویستێ جه‌نابێ سه‌رۆك و مه‌رجه‌عێ كوردستانێ سه‌رۆك مه‌سعود بارزانی دكه‌ین كو پێدڤیه حكومه‌تا فیدرال ژی پێداچۆنه‌كێ دچاره‌سه‌ركرنا ڤێ كێشێ دا بكه‌ت و هه‌روه‌سا ئه‌و كه‌س و لایه‌نێن ئه‌ڤ سكالایه تۆماركری دڤێت بزانن چ سه‌ركه‌فتن ل برسی كرن و قوتكرنا موچێ خه‌لكی دا نینه، به‌لكی ژبۆ وان شه‌رم و كرێتیه‌كا مه‌زنه، حكومه‌تا هه‌رێما كوردستانى ژ ڤان جۆره گڤاشتن و بڕیارا ناچه‌میێت، جه‌نابێ سه‌رۆك بارزانی خودان هێز و ئیراده‌یه‌ك خورتتره ژ بو تێپه‌راندنا ڤێ قوناغێ و پویچكرنا هه‌می وان پیلانێن دژى حكومه‌تا هه‌رێما كوردستانێ دئێنه كرن.
* ئه‌نداما ئه‌نجوومه‌نێ نوێنه‌رێن ئێراقێ