دهۆك –KDP.info- سه‌رۆكێ لیژنا خزمه‌تگۆزارى و ئاڤه‌دانیێ ل جڤاتا نوونه‌رێن عیراقێ دیار كر كو ژ ئه‌گه‌رێ شه‌رێ دژى تیرۆرستێن داعش ل سالێن بورى و هه‌بوونا هێزێن چه‌كدارێن نه‌شه‌رعى ل ده‌ڤه‌را شنگالێ، هه‌تا نوكه جینوسایدكرنا ده‌ڤه‌را ناڤهاتى یا به‌رده‌وامه و ژ به‌ر هه‌مان ئه‌گه‌ر هه‌تا نوكه زیان ب نێزیكى 48 هزار خانیێن شنگالێ كه‌فتیه.
مه‌حما خه‌لیل، سه‌رۆكێ لیژنا خزمه‌تگۆزارى و ئاڤه‌دانیێ ل جڤاتا نوونه‌رێن عیراقێ بۆ ماڵپه‌رێ فه‌رمیێ پارتى دیموكراتى كوردستان دیار كر كو هه‌تا رێككه‌فتنا شنگالێ د ناڤبه‌را هه‌رێما كوردستانێ و عیراقا فیدڕال دا نه‌هێته بجهئینان و هێزێن چه‌كدارێن نه‌شه‌رعى ژ شنگالێ ده‌رنه‌كه‌ڤن ره‌وشا شنگالێ ئاسایى نابیت و خه‌لك نه‌شیت ڤه‌گه‌ڕیته سه‌ر مال و مولكێن خوه، ئه‌ڤه د ده‌مه‌كى دایه كو ژ ژ ئه‌گه‌رێ شه‌رێ دژى تیرۆرستێن داعش ل سالێن بورى و به‌رده‌وامیا هه‌بوونا هێزێن چه‌كدارێن نه‌شه‌رعى ل شنگالێ، هه‌تا نوكه جینوسایدكرنا ده‌ڤه‌را ناڤهاتى یا به‌رده‌وامه و 70% ژ خه‌لكێ شنگالێ ژ ئاواره‌یێ ڤه‌نه‌گه‌ڕیاینه سه‌ر مال و مولكێن خوه، هه‌روه‌سا ئه‌ڤ چه‌نده بوویه ئه‌گه‌ر ژى كو زیان بگه‌هیته 48 هزار خانیێن قه‌زا شنگالێ و ده‌ستێ ئاڤه‌دانیێ نه‌گه‌هیتێ.
ناڤهاتى ئاماژه دا وێ چه‌ندێ كو نوكه ڕازیبوون ل سه‌ر بریارا تاپۆكرنا خانیێن خه‌لكێ قه‌زا شنگالێ هاتیه‌كرن و 300 هزار خێزانێن هه‌مان قه‌زا دێ ژ ڤێ بڕیارێ د مفاداربن، به‌لێ هندى هێزێن چه‌كدارێن نه‌شه‌رعى ل شنگالێ بن خه‌لك ڤه‌ناگه‌ڕیته سه‌ر مال و مولكێن خوه و هه‌ر دێ د ناڤ كه‌مپان دا مینن.
رێوار محه‌مه‌د ره‌شید