دهۆك -KDP.info- سكرتێكرا ئێكه‌تیا ئافره‌تێن كوردستانێ دیار كر 70 سالیا دامه‌زراندنا ئێكه‌تیا ئافره‌تێن كوردستانێ دێ ل رۆژا ئێكشه‌مبى 11/12/2022 ب ئه‌نجامدانا چه‌ندین كار و چالاكیان ل سه‌رانسه‌رى هه‌رێما كوردستانێ هێته ساخكرن.
د. ڤیان سلێمان، سكرتێرا ئێكه‌تیا ئافره‌تێن كوردستانێ بۆ ماڵپه‌رێ فه‌رمیێ پارتى دیموكراتى كوردستان دیار كر كو 70 سال ژ خه‌بات و تێكوشانا ئافره‌تا كوردستانى ب رێیا ئێكه‌تیا ئافره‌تێن كوردستانێ ژ پێخه‌مه‌ت بده‌ستڤه‌ئینانا مافێن نه‌ته‌وه‌یى و ئازادیا ئاخ و ئازادیا ئافره‌تێ و خه‌باتا یه‌كسانیێ ل هه‌مى ئافره‌تێن كوردستانێ و ب تایبه‌تى ئه‌ندامێن ئێكه‌تیا ئافره‌تێن كوردستانێ و رێبازا بارزانیێ نه‌مر پیرۆزبیت و گۆت: "هه‌ر ژ دامه‌زراندنا ئێكه‌تیا ئافره‌تێن كوردستانێ په‌یاما ئافره‌تا كوردستانێ په‌یاما رێكخراوا ئێكه‌تیا ئافره‌تێن كوردستانێ په‌یامه‌كا ئازادیخوازى، یه‌كسانى، دادپه‌روه‌ریا جڤاكى بوویه، سه‌ره‌رایى ڤێ چه‌ندێ ئافره‌تا كوردستانى هه‌لگرا په‌یاما وێره‌كى و ئازایه‌تیێ یه ژ دایكێن خوه ژ ئافره‌تێن بورى، ژ به‌ر ڤێ چه‌ندێ ژى ئه‌ڤرۆ ئافره‌تا كوردستانى پێدڤى سیمایه‌كێ سه‌رده‌میانه‌یه كو كه‌سیه‌تیا وێ یان نموونه‌یه‌كا جوان یا هه‌ڤپشكا خه‌م و ئازارێن نه‌ته‌وه‌یا خوه بیت و رۆله‌كێ به‌رچاڤ هه‌بیت د ئازدكرنا ئاخا خوه دا و حه‌زژێكرنا نشتیمانێ خوه بۆ پێشڤه‌برنا وه‌لاتێ خوه، هه‌روه‌سا هه‌ڤپشكه‌كا بزاڤا ئافره‌تان بیت ل سه‌ر ئاستێ جیهانێ بۆ بده‌ستڤه‌ئینانا ماف و ده‌ستكه‌فت و به‌رپرسایه‌تیێ د هه‌موو بوارێن ژیانێ دا و دینه‌موویه‌كا كاریگه‌ر بیت د پێشڤه‌برنا كومه‌لگه‌هێ دا".
ناڤهاتیێ ئاماژه دا وێ چه‌ندێ كو ل سپێده‌هیا رۆژا ئێكشه‌مبى 11/12/2022 ب هه‌لكه‌فتا 70 سالیا دامه‌زراندنا ئێكه‌تیا ئافره‌تێن كوردستانێ ل باره‌گایێ سكرتاریه‌تێ ل هه‌ولێرا پایته‌خت دێ پێشۆزى ل مێهڤانان هێته‌كرن، هه‌روه‌سا ب هه‌مان هه‌لكه‌فت دێ چه‌ندین په‌نه‌ل و سمینار هێنه پێشكێشكرن و چه‌ندین خولێن جوراوجور ژى دێ هێنه ڤه‌كرن و چه‌ندین چالاكیێن هونه‌رى ژى دێ هێنه ئه‌نجامدان و بازارێن كارێن ده‌ستى دێ هێنه ڤه‌كرن و هتد... و گۆت: "ئه‌و كار و چالاكیێن ب ڤێ هه‌لكه‌فتێ ل هه‌موو باژێر و باژارۆكێن هه‌رێما كوردستانێ دهێنه ئه‌نجامدان دێ بۆ ده‌مێ حه‌فتیه‌كێ د به‌رده‌وام بن".
رێوار محه‌مه‌د ره‌شید