ئه‌مڕۆ سێشه‌ممه 2022/12/6 به‌ڕێز نێچیرڤان بارزانى، سه‌رۆكى هه‌رێمى كوردستان له دیدارێكدا له هه‌ولێر له‌گه‌ڵ خاتوو جێسیكا سڤاردسترۆم باڵیۆزى نوێى سوید له عێراق، وێڕاى به‌خێرهێنان و پیرۆزبایى بۆ ده‌ستبه‌كاربوونى وه‌ك باڵیۆزى وڵاته‌كه‌ى له عێراق، هه‌موو پشتگیرییه‌كى بۆ سه‌رخستنى ئه‌ركه‌كه‌ى نیشان دا.
هه‌ردوولا بره‌ودان به په‌یوه‌ندییه‌كانى سوید له‌گه‌ڵ عێراق و هه‌رێمى كوردستانیان تاوتوێ كرد و جه‌ختیان له هاریكاریى هاوبه‌ش كرده‌وه، به‌تایبه‌تیش له‌و بوارانه‌دا كه جێى بایه‌خى هه‌ردوولان، دۆخى ناوخۆى هه‌رێمى كوردستان، ده‌رفه‌تى كار و وه‌به‌رهێنانى سوێدى له عێراق و هه‌رێمى كوردستان، هه‌روه‌ها ده‌رباره‌ى دوایین پێشهاته‌كانى دۆخى عێراق، شه‌ڕى دژى تیرۆر و ناوچه‌كه به‌گشتى، بیروڕیان ئاڵوگۆر كرد.