دھۆک -KDP.info- بەرپرسێ راگەھاندنێ ل رێڤەبەریا گشتی یا باژێرڤانیان ل پارێزگەھا دھۆکێ دیار کر کو پتری ٨٥% کار د دانانا کارگەھا ڤاڤارتنا گلێشی دا ل کومەلگەھا قەدشێ یا کو د کەڤیتە سنوورێ قەزا ئامێدیێ ب دووماھی ھاتیە و گۆت: "ئەڤ کارگەھە دێ گلێشێ ١٣ باژێرڤانیان وەرگریت".

ئەمیر ئەترووشی، بەرپرسێ راگەھاندنێ ل رێڤەبەریا گشتی یا باژێرڤانیان ل پارێزگەھا دھۆکێ بۆ ماڵپەرێ فەرمیێ پارتی دیموکراتی کوردستان دیار کر کو ل دەمەکێ نێزیک پرۆژێ کارگەھا ڤاڤارتنا گلێشی ل کومەلگەھا قەدشێ دێ ب دووماھی ھێت کو نوکە ب رێژا پتری ٨٥% کار د ڤی پرۆژەی دا ھاتیە ئەنجامدان و ئێدی وەلاتیێن دەڤەرێ بێزاریا خوە ژ بەر سۆتنا گلێشی نابینن و دێ ژینگەھا دەڤەرێ ژی ب شێوەیەکێ گشتی ھێتە پاراستن، ژ بەر کو ئەڤ کارگەھە دێ گلێشێ ١٣ باژێرڤانیان ھەر ژ ناحیا زاویتە و کومەلگەھا باگێرا و ھەتا ناحیێن شێلادزێ و چەمانکێ و کانی ماسێ ژی وەرگریت و گۆت: "سەرەرایی مفایێن کارگەھێ بۆ پاراستنا ژینگەھێ دێ ژمارەکا مەزن یا دەلیڤێن کاری ژی بۆ خەلکێ دەڤەرێ ل ڤێ کارگەھێ پەیدابن".

ناڤھاتی ئاماژە دا وێ چەندێ کو ئەڤ کارگەھە ل سەر بۆدجا حکومەتا ھەرێما کوردستانێ ل سەر رووبەرێ ٩٦ دونەمێن ئەردی یا دھێتە دانان و گۆت: "بەری سێ سالان ئەڤ پرۆژە کەفتبوو د بوارێ بجھئینانێ دا، بەلێ ل دو سالێن بۆری ژ بەر گرتنبەرا رێکارێن ساخلەمیێ بۆ خوەپاراستن ژ ڤایرۆسێ کۆرۆنایێ ھەتا رادەیەکی کار د دانانا ڤێ کارگەھێ دا گیروببوو".

رێوار محەمەد رەشید