Hewlêr-KDP.info- Berdevkê PDKê Mehmûd Mihemed ragihand, ewê sibê bi bizava Sedir û aliyên sunnî re li ser çawaniya nehîştina xitimandina siyasî li Iraqê dest bi civînan bikin.

Encumena serkirdetiya PDKê îro bi serokatiya Serok Barzanî civiya. Piştî civînê berdevkê partiyê Mehmûd Mihemed naveroka civînê ji raya giştî re eşkere kir.

Mehmûd Mihemed da zanîn, di civînê de behsa rewşa siyasî ya Iraqê, pêwendiyên PDKê bi aliyên Iraqî û Kurdistanî re, rewşa navxwe ya Kurdistanê û rewşa PDKê hatin axaftin.

Berdevkê PDKê li ser rewşa Iraqê got, emê sibê bi aliyên din yên tifaqa Rizgariya Niştiman (Sedir û sunnî) re dest bi civînan bikin bo çawaniya nehîştina xitimandina siyasî li Iraqê.

Mehmûd Mihemed li ser rewşa navxwe û xebatên parlementoya Kurdistanê jî got, parlemento ne tenê bo mijara hilbijartinan lê divê bo karên hikûmetê jî bicive ji ber ku hikûmetê çendîn pirojeqanûn li ser reforman amade kiriye û divê parlemento li ser gotûbêj bike.

Li ser wan gotegotên ku behsa hilweşandina parlementoya Kurdistanê jî dikin, Mehmûd Mihemed got, me hizra wê yekê nekiriye û em tiştekî wisa rast jî nabînin.

Li ser pêwendiyên PDK û YNKê jî berdevkê PDKê got, em dixwazin di asta bilind de hev bibînin. Baş nîne PDK û YNK û Gorran bi rêya medyayê gotûbêj bikin û bersiva hev bidin. Divê em gotûbêj bikin û bi diyalogê vê qonaxê derbas bikin.

Mehmûd Mihemed behsa kongireya 14 ya PDKê jî kir û got, dest bi amadekariyan hatiye kirin û dê meha 10 yan jî 11 ya îsal kongireya 14 were lidarxistin.