بەغدا-KDP.info- نوێنەری ھەردوو وەزارەتی ناوخۆ و پێشمەرگە لە فەرماندەی ئۆپڕاسیۆنی ھاوبەشی عێراق ڕایگەیاند، چارەسەرکردنی دۆخی شنگال لە ئەستۆی حکوومەتی عێراق دایە، چونکە بڕیاردراوە کە پەکەکە و ھێزی میلیشیا شنگال چۆڵ بکەن، بۆیە پێویستە ئەو بڕیارە جێبەجێ بکرێت، ئینجا گەر بەخۆشی نەبێت پێویستە ھێز بۆ چۆڵکردنیان بەکار بھێندرێت، ئەگەرنا دۆخەکە چارەسەر نابێت و خەڵکیشی بۆ ناگەڕێتەوە، ھاوکات حکوومەتی عێراق سنووری نێوان عێراق و سووریا ھەمووی تەڵبەند دەکات، ئەمەش بۆ ڕێگریکردنه‌ لە ھاتووچۆی داعش و پەکەکە ھەروەھا ئەنجامدانی کاری قاچاغی.

لیوا عەبدولخالق تەڵعەت، بۆ ماڵپەڕی فەرمیی پارتی دیموکراتی کوردستان گوتی: "دۆخی شنگال لە ڕووی ئەمنی زۆر خراپە، تاوەکو ھێزی میلیشیا و پەکەکە لە شنگال ھەبن دۆخی ئەو شارە خراپ دەبێت و ئاسایی نابێتەوە، چونکە بەردەوام حکوومەت شاند ڕەوانە دەکات و ھیچ ئەنجامێکی نابێت، چونکە ئەوە چارەسەری دۆخی شنگال ناکات و پێویستە ئەو ڕێککەوتنەی کراوە جێبەجێ بکرێت".

نوێنەری ھەردوو وەزارەتی ناوخۆ و پێشمەرگە لە فەرماندەی ئۆپڕاسیۆنی ھاوبەشی عێراق گوتیشی: "پێویستە بۆ ئاساییکردنەوەی دۆخی شنگال ئەو بڕیارە جێبەجێ بکرێت کە حکوومەتی عێراق داویەتی بۆ چۆڵکردنی پەکەکە و میلیشیاکان لە شنگال، چونکە بڕیارەکە دراوە و جێبەجێ نەکراوە، ئەوەش لە ئەستۆی حکوومەتی عێراقە، چونکە ھەرێم و بەغدا ڕێککەوتنیان کردووە لەسەر چەند خاڵێک، کە سەرەتا دۆخی شنگال لە ڕووی ئەمنی ئاسایی بکرێتەوە ئەویش بەدەرکردنی ھێزی پەکەکە و میلیشیاکان، بۆ ئەوەی دواتر ھەنگاوی دیکە بنرێت بۆ گەڕانەوەی ئاوارەکان، بۆیە خاڵی یەکەم پێویستە جێبەجێ بکرێت".

لیوا عەبدولخاڵق تەڵعەت گوتیشی: "کۆمەڵێک ھێزی چەکدار لە شنگال ھەن و پێویستە حکوومەتی عێراق ئەگەر بەخۆشی ئەو ھێزانە ناوچەکە چۆڵ نەکەن ھێز لە دژیان بەکار بێنێت و ھەر چۆنێک بێت شنگال چۆڵ بکەن، چونکە ناکرێت دۆخی شنگال بەردەوام لەڕووی ئەمنیەوە بەو شێوەیە خراپ بێت".

تەڵعەت ڕوونیشی کردەوە: "بۆ کۆنترۆڵکردنی سنووری سووریا ھێزێکی زۆر ڕەوانەی سەر سنوور کراوە ئەمەش بۆ چەند مەبەستێکە لەوانە ڕێگریکردن لە قاچاغی و ھاتنی تیرۆرستانی داعش و ھاتووچۆکردنی پەکەکە لەو سنوورە، ئەمەش وای کردووە کە ھێزەکانی پەکەکە ناڕازی بن، چونکە زیانی بۆ ئەوان ھەیە، بەڵام تا ئێستا سنوور باش کۆنترۆڵ کراوە و بەردەوامیش کاری لەسەر دەکرێت، چونکە بڕیاردراوە رێگا بەھیچ کەسێک نەدرێت ھاتووچۆ لە نێوان عێراق و سوریا بکات، لەبەر ئەوەی ھەموو جۆرە کارێکی قاچاغی لە سنووری نێوان عێراق و سووریا دەکرێت و مەبەست لە تەلبەندکردنی سنووریش بۆ ئەو مەبەستەیە، چونکە سنوور کراوە بوو ھەروەھا چەندین کاری خراپ لەو ڕێگەیەوە ئەنجام دەدرا".

ھاوکات وتیشی: "ئەو ھەنگاوە زۆر گرنگە ھەم ڕێگری دەکات لە ھاتنی چەکدارانی داعش و ھەمیش ڕێگری دەکات لە کاری قاچاغی و ھاتووچۆی پەکەکە لەو سنوورە".

بڵند ئیبراھیم