ھەولێر-KDP.info- ئیمانوێل ماکرۆن، سەرۆککۆماری فەرەنسا، یەکشەممەی داھاتوو سەردانی ھەرێمی کوردستان دەکات و لە ھەولێر لەگەڵ سەرۆک بارزانی کۆدەبێتەوە، نوێنەری حکوومەتی ھەرێمی کوردستانیش لە فەرەنسا، باس لە سەردانی سەرۆکی فەرەنسا بۆ ھەرێمی کوردستان دەکات و دەڵێت، جێگای دڵخۆشییە لەم کاتەدا ماکرۆن سەردانی کوردستان بکات.
سەبارەت بە سەردانەکەی سەرۆکی فەرەنسا بۆ ھەرێمی کوردستان، عەلی دۆڵەمەری، نوێنەری حکوومەتی ھەرێمی کوردستان لە فەرەنسا، بە ماڵپەڕی فەرمیی پارتی دیموکراتی کوردستانی ڕاگەیاند، ئیمانوێل ماکرۆن، سەرۆکی فەرەنسا، بە سەردانێکی فەرمی ڕۆژی یەکشەممە بەرواری ٢٩ی ٨ دەگاتە ھەولێری پایتەختی ھەرێمی کوردستان و لەگەڵ بەرپرسانی باڵای ھەرێمی کوردستان کۆدەبێتەوە.
دۆڵەمەری گوتیشی، لەو سەردانەیدا ئیمانوێل ماکرۆن لەگەڵ سەرۆک مەسعوود بارزانی و سەرۆکی ھەرێمی کوردستان نێچیرڤان بارزانی و بەرپرسانی باڵای حکومەتی ھەرێمی کوردستان کۆدەبێتەوە، ھەر لە میانی سەردانەکەیدا لە ھەولێر، سەرۆکی فەرەنسا چاوی بە خانەوادەیەکی شەھیدان دەکەوێت، دوای دیدار و کۆبوونەوەکانی لەگەڵ بەرپرسانی باڵای ھەرێمی کوردستان، بڕیارە ماکرۆن لە ھەولێرەوە سەردانی مووسڵ بکات و دواتر چاوی بە برا ئێزدییەکان دەکەوێت.
ئاماژەی بەوەش دا، سەردانی سەرۆکی فەرەنسا بۆ کوردستان جێگای دڵخۆشییە لەم کات و ساتەدا کە ڕۆژھەڵاتی نێوەڕاست بە قۆناغێکی زۆر ناخۆشدا تێدەپەرێت، بۆیە لەو سەردانەیدا چەندین بابەت دێتە باسکردن، لەوانە پەیوەندییەکانی نێوان ھەولێر و بەغدا و پەیوەندییە مێژووییەکانی فەرەنسا و ھەرێمی کوردستان لە ھەموو بوارەکانی سیاسی، ئابووری، دیبلۆماسی و ڕۆشنبیری، ھاوکات باس لە ھەڵبژاردنە پێشوەختەی عێراق دەکرێت، بە تایبەت داھاتووی عێراق بە گشتی و ھەرێمی کوردستان، ھەروەھا باس لە وەبەرھێنانی فەرەنسیەکان لە ھەرێمی کوردستان دەکرێت.
ماکرۆن لە دوای فرانسۆ ئۆلاند، سەرۆککۆماری پێشووی فەرەنسا، دەبێتە دووەم سەرۆکی فەرەنسا سەردانی ھەرێمی کوردستان بکات.
ھەڵکەوت محەمەد