دهۆک-KDP.info- ئەنجومەنێ پارێزگەها دهۆکێ ئەڤرۆ رۆژا 7/4/2021 ل دەمژمێر 11:00 سپێدێ کۆمبوونا خوە یا ئاسایی ئەنجامدا و تێدا دەنگدان ل سەر پۆستێن دو قایمقامی و پێنج رێڤەبەریێن ناحیان ل دهۆکێ هاتەکرن و هاتنە پەسەندکرن یێن كو ژ لایێ پارێزگه‌رێ دهۆكێ ڤه هاتینه به‌ربژێركرن.
فەهیم عەبدوللا حەمۆ، سەرۆکێ ئەنجومەنێ پارێزگەها دهۆکێ ئاشکرا کر کو ئه‌ڤرۆ ئەنجومەنێ پارێزگه‌ها دهۆكێ ده‌نگدان ل سه‌ر په‌سه‌ندكرنا به‌ربژێران بۆ هه‌ر ئێك ژ پۆستێن قایمقامیێن قەزا (زاخۆ و ئامێدیێ) و رێڤەبەریێن ناحیێن (بجێل، زاویتە، گردەسین، شێڵادزێ، مانگێش) ل سنوورێ پارێزگەها دهۆکێ کر و د ئەنجامدا ب زۆرینەیا دەنگێن ئەندامێن ئەنجومەنێ پارێزگەهێ ناڤێن به‌ربژێران ب ڤی شێوه‌یی هاتنه په‌سه‌ندكرن (مشیر محەمەدبەشیر) بۆ پۆستێ قایمقامیا قەزا (زاخۆ) ب سەرجەمێ (24) دەنگان ل جهێ (بوتان محسن) هاتە پەسەندکرن، هەروەسا (وارشین سەلمان) بۆ پۆستێ قایمقامیا قەزا (ئامێدیێ) ب سەرجەمێ (24) دەنگان ل جهێ (ئیسماعیل مستەفا) هاتە پەسەندکرن.
ناڤهاتی ئاماژە دا وێ چەندێ کو د هەمان کۆمبوون دا (ڤەهێل موەفەق) بۆ پۆستێ رێڤەبەرێ ناحیا بجێل ب سەرجەمێ (21) دەنگان ل جهێ (فەرهاد مەحمود) هاتە پەسەندکرن، هەروەسا (ئدریس محەمەد) ب سەرجەمێ (21) دەنگان بۆ پۆستێ رێڤەبەرێ ناحیا زاویتە ل جهێ (مشیر محەمەدبەشیر) هاتە پەسەندکرن، هەروەسا (بریندار حەیدەر) ب سەرجەمێ (21) دەنگان بۆ پۆستێ رێڤەبەرێ ناحیا مانگێش ل جهێ (مشتاق عسمەت) هاتە پەسەندکرن، هەروەسا (ئەحمەد سلێمان) ب سەرجەمێ (21) دەنگان بۆ پۆستێ رێڤەبەرێ ناحیا گردەسین ل جهێ (سەگڤان سلێڤانەیی) هاتە پەسەندکرن، هەروەسا (رزگار عوبەید) ب سەرجەمێ (21) دەنگان بۆ پۆستێ رێڤەبەرێ ناحیا شێلادزێ ل جهێ (وارشین سەلمان) هاتە پەسەندکرن.
هەژی گۆتنێ یە کو هەر دوو فراکسیۆنێن یەکگرتوو ئیسلامی کوردستان و ئێکەتی نیشتیمانی کوردستان دەنگ ب بەربژێرێن پوستێن رێڤەبەرێن ناحیان نەدا و فراکسیۆنا گۆران ژی د کۆمبوونێ دا ئامادە نەبوو.
رێوار محەمەد رەشید