دھۆک-KDP.info- جێگرێ پارێزگارێ دھۆکێ بۆ کاروبارێن تەکنیکی ب وەکالەت دیار کر کو ل دەمەکێ نێزیک ژمارەکا پرۆژێن ستراتیژی یێن گرنگ دێ ل پێنج قەزایێن پارێزگەھا دھۆکێ ھێنە چێکرن و گۆت: "ب مەرەما وەرگرتنا رازەمەندیێ لیستا ئەنجامدانا ڤان پرۆژان دێ بۆ جڤاتا وەزیران ھێتە ھنارتن".
ماجد سەید سالح، جێگرێ پارێزگارێ دھۆکێ بۆ کاروبارێن تەکنیکی ب وەکالەت بۆ مالپەرێ فەرمیێ پارتی دیموکراتی کوردستان دیار کر کو ل دووڤ ڕاسپاردێن کۆمبوونا جڤاتا وەزیران ژمارەکا پرۆژێن گرنگ یێن خزمەتگۆزاری ل قەزایێن (دھۆک، شێخان، ئاکرێ، بەردەرەش، سێمێل)ێ دێ ھێنە ئەنجامدان بۆ ڤێ مەرەمێ ژی وان دوھی کۆمبوونەک دگەل ژمارەکا قائیمقام و رێڤەبەرێن سازیێن پەیوەندیدار ئەنجامدایە. ناڤھاتی ئاماژە دا وێ چەندێ کو د کۆمبوونێ دا پشتی دانوستاندن ل سەر چەندین پرۆژێن گرنگ یێن ب ژیانا رۆژانە یا وەلاتیان ڤە د گرێدایی ھاتیەکرن، لیستەکا پرۆژێن گرنگ ب کۆژمێ (٢٦ ھەتا ٣٠) ملیار دیناران ھاتە ئامادەکرن و گۆت: "ئەڤ لیستە دێ ب زووترین دەم بۆ جڤاتا وەزیرێن حکومەتا ھەرێما کوردستانێ ھێتە رەوانەکرن بۆ وێ چەندێ ڕازەمەندی ل سەر بھێتەکرن و بکەڤنە د بوارێ بجھئینانێ دا، ئەڤە ددەمەکی دایە کو بەری نوکە ل دووڤ ڕاسپاردا سەرۆکێ حکومەتا ھەرێما کوردستانێ نێزیکی ١٥٠ پرۆژێن خزمەتگۆزاری ل سنوورێ قەزا (زاخۆ و ئامێدیێ) ھاتینە ئەنجامدان.
رێوار محەمەد رەشید