زاخۆ-KDP.info- بڕیارە لە سنووری قەزای زاخۆ ژمارەیەک پڕۆژەی کەرتی گەشتوگوزار جێبەجێ بکرێن و بەڕێوەبەری گەشتوگوزاری قەزاکەش دەڵێت، بەشێک لەو پڕۆژانە ستراتیژین و لەسەر ئاستی عێراق نموونەن.
چیا ئەمین، بەڕێوەبەری گەشتوگوزاری زاخۆ، بە ماڵپەڕی فەرمیی پارتی دیموکراتی کوردستانی ڕاگەیاند: " بڕیارە ژمارەیەکی بەرچاوی پڕۆژە لە سنووری زاخۆ بکەونە بواری جێبەجێکردنەوە کە بەشێک لەو پڕۆژانە ستراتیژین."
بەڕێوەبەری گەشتوگوزاری زاخۆ دەشڵێت: "پڕۆژەی ''گەلی شەرانش'' و پڕۆژەی ''گەلی زاخۆ'' دوو پڕۆژەی ستراتیژین کە دیزاینیان بۆ کراوە و ئەمساڵ دەچنە بواری جێبەجێکردنەوە، بەتایبەتی پڕۆژەی گەشتیاریی گەلی زاخۆ، کە بڕیارە بکرێتە شارێکی گەشتیاری و بەپێی ستانداردی ئەورووپی دروست بکرێت، شاری گەشتیاریی زاخۆ ھەموو خزمەتگوزارییەکی تێدا دەبێت و دەبێتە یەکێکە لە پڕۆژە گەشتیارییەکان نەک لەسەر ئاستی کوردستان، بەڵکو لەسەر ئاستی عێراق و ناوچەکە."
چیا ئەمین جەختی کردەوە: "چەندین پڕۆژەی دیکەی گەشتیاری ئامادە کراون لەنێو ماستەرپلانی گەشتیاریی زاخۆ، لەوانەش گرنگیدان بە خابووری زاخۆ و دروستکردنی چەندین پارک و پڕۆژەی ھەمەجۆر. سەرۆکی حکوومەتی ھەرێمی کوردستانیش پاڵپشتیی خۆی بۆ گەشەپێدانی کەرتی گەشتیاری پێشان داوە."
قائید میرۆ