دهۆک-KDP.info- بەرپرسێ بەشێ مۆلەتان ل رێڤەبەریا گشتی یا گەشت و گۆزارێ ل پارێزگەها دهۆکێ ئاشکرا کر کو د سالا 2020 ێ دا 32 بنگەهێن نوی یێن گەشتیاری ل پارێزگەها دهۆکێ هاتینە ڤەکرن و دهەمان دەم دا 23 بنگەهێن گەشتیاری داخوازا ڕاگرتنا مۆلەتێن کاری کربوو.
خالد حەیدەر، بەرپرسێ بەشێ مۆلەتان ل رێڤەبەریا گشتی یا گەشت و گۆزارێ ل پارێزگەها دهۆکێ بۆ ماڵپەرێ فەرمیێ پارتی دیموکراتی کوردستان ئاشکرا کر کو ژ بەر وێ ئێمناهیا ل هەرێما کوردستانێ ب گشتی و پارێزگەها دهۆکێ بتایبەتی هەی سال بۆ سالێ رێژا ڤەکرنا بنگەهێن نوی یێن گەشتیاری د زێدەبوونێ دایە، ل سالا بۆری سەرەرایی گرتنەبەرا رێکارێن ساخلەمیێ بۆ خوەپاراستنێ ژ ڤایرۆسێ کۆرۆنایێ و قەدەغەیا هاتنوچوونێ 32 بنگەهێن نوی یێن گەشتیاری کو د پێکهاتی بوون ژ (ئۆتێل، کۆمپانی،خوارنگەه، ڤەخوارنگەه و هتد...) و بەهرا پتریا ڤان بنگەهان د سالا بۆری دا پشتی رابوونا قەدەغەیا هاتنوچوونێ و ڤەکرنا خالێن سنووری و زالگەهان ل هەمبەر هاتنا گەشتیاران هاتینە ڤەکرن و گۆت: "بەهرا پتریا گەشتیارێن سەرەدانا پارێزگەها دهۆکێ دکەن ب رێژا پتری 80% ئەون یێن کو ژ باژێرێ میسل و پارێزگەهێن ناڤەڕاست و ژێریا عیراقێ دهێن".
ناڤهاتی گۆت: "د سالا بۆری دا دەمێ قەدەغەیا هاتنوچوونێ هاتیە راگەهاندن بۆ خوەپاراستن ژ ڤایرۆسێ کۆرۆنایێ زیانەکا مەزن گەهشتە بنگەهێن مە یێن گەشتیاری ژ بەر ڤێ چەندێ 23 بنگەهان مۆلەتێن خوە یێن کارکرنێ ڕاگرتن و نەهـ بنگەهێن دی ژی مۆلەتێن خوە هەلوەشاندن، ئەڤە ددەمەکی دایە نوکە 860 بنگەهێن گەشتیاری یێن مۆلەتدایی ل پارێزگەها دهۆکێ هەنە و گۆت: "پتری 10 هزار گەنجان ل بنگەهێن گەشتیاری یێن پارێزگەها دهۆکێ کار دکەن".
رێوار محەمەد رەشید