دھۆک-KDP.info- دچارچوڤێ وان گۆرانكاریێن كارگێرى ل پارێزگه‌ها دهۆكێ ھاتینە ئەنجامدان، ئه‌ڤرۆ رۆژا چارشەمبی جڤاتا پارێزگه‌ها دهۆكێ كۆمبونەکا فەرمی ئەنجامدا و تێدا به‌ربژێرێن دوو پوستێن دى یێن رێڤه‌به‌رێن گشتى دەنگدان ل سەر ھات ئەنجامدان. 

فەھیم عەبدۆلا سەرۆکێ جڤاتا پارێزگەها دهۆکێ د کۆنگرەیەکێ رۆژنامەڤانی دا دیارکر: " دچارچوڤێ وان گۆرانكاریێن كۆ ل پارێزگه‌ها دهۆكێ د پۆستێن كارگێرى دهێنه‌ ئەنجامدان، ئه‌ڤرۆ جڤاتا پارێزگه‌ها دهۆكێ كۆمبونەک فەرمی ئەنجامدا و ده‌نگ ل سه‌ر دوو به‌ربژاران بۆ هه‌ر ئێك ژ پۆستێن رێڤه‌به‌رییا گشتى یا كاروبارێن مین و ته‌قه‌مه‌نیان ل پارێزگه‌ها دهۆكێ و رێڤه‌به‌رییا گشتى یا رێك و پرا و ئاڤه‌دانكرن و نیشته‌جێكرنێ ل پارێزگه‌ها دهۆكێ دا كۆ ئێك ژ وان ئافره‌ته‌ و هه‌ردوو پۆست ژى یێن پارتى دیموكراتى كوردستان بوون کو پێشتر ژلایێ ئێكگرتوویا ئیسلامیا كوردستانێ دهاتنه‌ برێڤه‌برن"

سەرۆکێ جڤاتا پارێزگەها دهۆکێ گۆت ژی:" د کۆمبونا ئەڤرۆ دا، شێرزاد قادر وەکە رێڤەبەرێ گشتی یێ رێک و پرا و ئاڤەدانکرنێ و شیڵان سامر وەکە رێڤەبەرا گشتی یا کارۆبارێن مین ل پارێزگەھا دھۆکێ ھاتنە دیارکرن و پشتى په‌سه‌ندكرنا ناڤێن به‌ربژێران، ناڤ بۆ جڤاتا وه‌زیران یا حوكمه‌تا هه‌رێما كوردستانێ ھێنە رەوانەکرن تا کۆ بچنە بوارێ جھ ئینان و رازیبوونێ دا و ب ھیڤیا وێ چەندێ ب شێوەیەکێ باشتر خزمەتا خەلکێ ڤێ پارێزگەھێ بھێت کرن".

سەرۆکێ جڤاتا پارێزگەھا دھۆکێ ئه‌و ئێك ژى خویا کر کو د پشکا دوویێ یا کۆمبوونا ئەڤرۆ یا جڤاتا پارێزگەھا دھۆکێ دا ب تێکرایا دەنگێن ئەندامێن جڤاتێ بابەتێ بەرفرەھکرنا سنوورێ گوندێ (کانیلان) یێ سەر ب قەزا بەردەرەش ڤە ھاتە پەسەندکرن.

رێوار محەمەد رەشید