عەلی عەونی
جڤاکا جیھانی و مرۆڤایەتی دگەل کوردستانیان گەلەک دلڕەق و بێ دلۆڤانی بوویە. د قڕ کرن و ئەنفال و کیمیابارانکرنێدا ھیچ کەس و لایەن و دەزگەھەکێ مرۆڤایەتی د ھەوارا کوردستانیان نەھات. کەس بۆ برینا ڤەکری یا کوردستانێ نەئێشا و نەگری. کەسێ شەرم ژ مرۆڤ بوونا خۆ نەکر دەمێ ددیت داگیرکەرێن ھۆڤێن کوردستانێ بزاڤا گوھۆڕینا دیموگرافیا کوردستانێ و نەھێلانا زمانێ کوردی ددەن. ژ بلی کوردان ( ئەو ژی ب بێتفاقی ) کەسەکێ خەما کوردستانێ نەخوار. رێکخراوێن مافێ مرۆڤ و یاسایێن نەتەوەیێن ھەڤگرتی و پرێنسیپێن ودرۆ ویلسون ب فلسەکی نەچوون.
د تاریستانا بێپشتی و بێکەسیا کوردستانیان تنێ ویژدانا مێرسەرەکی (نە کورد) لڤی و مرۆڤاتیا وی ئینا بیرا وی و لدژی دڕندەترین داگیرکەرێ کوردستانێ راپەڕی و بەرسینگێ وان گرت و ھەموو نرخەک بۆ سنج و ھزرا خۆ دا. وی درەوێن ئاتاتورکی و دەولەتا وی سپی کرن. چەند کاریگەر و جوان و دجھێ خۆ دا بوو ئەڤ رابوونا بێشکچی.
ئەڤە دەمەکە میدیا پ ک ک و تورکان پێکڤە ب دژواری بێڕێزیێ ب دکتور ئیسماعیل بێشکچیێ مرۆڤ و ویژدان زیندی دکەن. ھەر کەسەکێ پیچەکا ھەستێ مرۆڤ بوون و کورد بوونێ د مەژیێ ویدا ھەبیت دێ ل بێشکچی خودان دەرکەڤیت. ئەم دزانین تورک پێویستە دژی بێشکچی بن، بلا پ ک ک و دەستە و ھەڤال و ھەڤ ھزرێن وان ھێڕشێن قڕێژێن خۆ لسەر بێشکچی راوەستینن.
بێشکچی مولکێ مرۆڤایەتی و ھەموو کوردستانیانە. ئەڤە پیلانا تورک و داگیرکەرێن دی یێن کوردستانێ یە کو بەشەکێ کوردستانیان لژێر ناڤێ پ ک ک بکەنە دوژمنێ وی. بلا مە تشتەک بمینیت کو مە کۆم دکەت.