Hewlêr-KDP.info- Serokwezîrê Hikûmeta Herêma Kurdistanê veberhênerên Amerîkî û biyanî han dide ku weberhênana zêdetir li Herêma Kurdistanê bikin û dibêje jî, aramî û zemîn hatiye pêkanîn bo weberhênana biyanî û ew kar dikin ku di 5 salên bê de Herêma Kurdistanê bibe herêmeke hinardekar.

Serokwezîr Mesrûr Barzanî di axaftina xwe ya "Konferansa Aboriya Herêma Kurdistanê Piştî Koronayê" de, ku bi awayekî vîdeo-konferans birêve çû, ji kompaniyên Amerîkî û biyanî daxwaz kir ku berê xwe bidin Herêma Kurdistanê û karên veberhênanê encam bidin.

Mesrûr Barzanî destnîşan kir ku zemîneke Herêma Kurdistanê ji bo veberhênanê heye û ji aliyê ewlehiyê ve cihê herî aram a Iraq û herêmê ye û ew dixwazin kompaniyên biyanî han bidin ku veberhênanê li Herêma Kurdistanê bikin û ji bo vê mebestê jî dê hêsankarî ji bo kompaniyên biyanî bikin.

Herwiha Serokwezîr Mesrûr Barzanî diyar kir: “Dîrokeke baş a me û Amerîkayê heye, bi taybetî piştî 2003an. Amerîka di rizgarbûna Iraqê ji destê dîktator Sedam de alîkar bû. Niha jî Iraq di rewşeke xirab de ye. Xelk û nifşê me yê nû dixwazin û çavê wan li wê yekê ye ku aboriyeke baş û alîkariyeke zêdetir were kirin. Peyama min ew e ku li Herêma Kurdistanê veberhênanê bikin û me ji bo vê yekê konferans li dar xist. Dostên me yên gelek baş hene li Amerîkayê, niha ligel me ne. Ez dixwazim spasiya rêkxerên vê konferansê û hevkarên me yên li hikûmeta Amerîkayê bikim. Ez dixwazim spasiya Balyoz jî bikim, ku îro ligel me ye. Bêguman ez pêşwazî li hatina kompaniyên Kurdî û Amerîkî dikim, ku îro li vê konferansê civiyane, da ku peywendiyeke bihêz çêbikin. Peywendiya me vedigere 1990î û ew dema ku Amerîkayê hêviyek bo gelê me vegerand û derfet da, ew bi hezaran gundên li serdema Sedam hatibûn wêrankirin, avabûnek dîtin. Herwiha di gelek waran de hevkarên me bûn, loma ez bawer im ku îro jî em dikarin wê hevkariyê pêşve bibin.”

Li ser lidarxistina "Konferansa Aboriya Herêma Kurdistanê Piştî Koronayê" diyar kir: "Ez dixwazim spasiya rêkxerên vê konferansê û hevkarên me yên li hikûmeta Amerîkayê bikim. Ez dixwazim spasiya Balyoz jî bikim, ku îro ligel me ye. Bêguman ez pêşwazî li hatina kompaniyên Kurdî û Amerîkî dikim, ku îro li vê konferansê civiyane, da ku peywendiyeke bihêz çêbikin. Peywendiya me vedigere 1990î û ew dema ku Amerîkayê hêviyek bo gelê me vegerand û derfet da, ew bi hezaran gundên li serdema Sedam hatibûn wêrankirin, avabûnek dîtin. Herwiha di gelek waran de hevkarên me bûn, loma ez bawer im ku îro jî em dikarin wê hevkariyê pêşve bibin.”

Mesrûr Barzanî destnîşan kir: “Herêma Kurdistanê herêmeke gelek baş û guncaw e ji bo ku kompaniyên Amerîkî werin vê derê û derfetên kar bibînin, rewşa jiyanê gelek baştir bikin.”

Serokwezîrê Herêma Kurdistanê diyar kir: “Hikûmeta min ji bo hêsankariyên gelek zêde werin kirin dixebite, da ku kompaniyên biyanî bi hêsanî werin Herêma Kurdistanê û tomarkirina kompaniyan û dayîna vîze û babetên din hêsan bibe.”

Mesrûr Barzanî eşkere dike: “Herêma Kurdistanê derwazeyekî gelek baş e ji bo veberhênana Amerîkayê û dibe ku bibe derwazeyekî baş ji bo Iraq û Rojhilata Navîn û hêzeke me ya bi bandor a kar heye û ji aliyê teknolojî û zimanan ve, bi taybetî Îngilîzî û Erebî ve, gelek baş in. Loma em dixwazin piştrast bibin ku ji bilî derfetên kar pêk bînin, sûd ji şiyan û enerjiya wan jî were dîtin û em bi vê cûreyê dikarin pêş bikevin.”

Serokwezîr Mesrûr Barzanî destnîşan kir: “Herêma Kurdistanê cihê ewil e ku çandinî tê de hatiye kirin. Herêma me dixwaze bigihîje asta debara xwe û di pênc salên bê de, bibe cihekî wisa ku berhemên xwe bo Iraq û herêmê hinarde bike. Ev jî bi siyaseteke baş bi dest dikeve.”

Mesrûr Barzanî eşkere kir: “Ez hêvî dikim ku vê derfetê bi kar bînin û serdana Herêma Kurdistanê bikin û bi çavên xwe guhertinan bibînin, ku kabîneya nehem ev guhertin kirine.”

Serokwezîrê Herêma Kurdistanê dibêje, “Em kar dikin bo ku li gel hikûmeta Iraqê bigihijin rêkeftinê ku em mafên xwe bidest bixin... (hevdem), pişka Herêma Kurdistanê di budceyê de bidest bixin.”

Mesrûr Barzanî behsa peywendiya telefonî ya xwe û Wezîrê Enerjiyê yê Amerîkayê Dan Brouillette kir û amaje bi wê kir ku, Brouillette tekezî li ser wê kiriye, kompaniyên Amerîkî dê weberhênana zêdetir li Herêma Kurdistanê bikin. Mesrûr Barzanî got jî, “em pabend in bi pêkanîna derfetan bo weberhênana kompaniyên Amerîkî.”

Cîgirê Wezîrê Enerjiya Amerîkayê Mark Menezes jî di çarçova wê konferansê de axivî û got, “Herêma Kurdistanê navçeyeke hêvîbexş e bo pêşerojê di warê enerjiyê de” û diyar jî kir ku divê Iraq û Herêma Kurdistanê kar bo geşepêdan û mezinkirina bazarên xwe bikin.

Di dawiya axaftina xwe de Serokwezîr diyar kir: “Ez hêvîdar im ku ev konferansa bazirganî Kurd û Amerîkî bicivîne û derfetan yek bixe û alîkar be ku aboriya Herêma Kurdistanê biçe qonaxeke din.”